ವಾಚಕರ ವಾಣಿ: ಮನಸ್ಸಿನ ಮಸಿ ತೊಳೆಯಬೇಕಿದೆ

ಇದು, ಅವರ ನೋವಿನ ಮಾತೇ ವಿನಾ, ಇಂಗ್ಲಿಷ್‌ ಭಾಷೆಯ ನಾಮಫಲಕಗಳಿಗೆ ಬಸಿ ಬಳಿಯಲು ಕೊಟ್ಟ ಕರೆಯಲ್ಲ. ಈ ಹಿಂದೆ ಇಂಗ್ಲಿಷ್‌ ಭಾಷೆಯ ನಾಮಫಲಕಗಳಿಗೆ ಡಾಂಬರು ಬಳಿಯುವ ಯೋಜನೆಯನ್ನು ಕನ್ನಡಪರ ಹೋರಾಟಗಾರರು ಹಮ್ಮಿಕೊಂಡಿದ್ದರು. ಅದಕ್ಕೆ ಬಹಳಷ್ಟು ಟೀಕೆಗಳು ಎದುರಾಗಿದ್ದರಿಂದ ಆ ಯೋಜನೆ ಮುಂದುವರಿಯಲಿಲ್ಲ. ಒಂದು ವೇಳೆ ಮುಂದುವರಿದಿದ್ದರೂ ಕನ್ನಡದ ನಾಮಫಲಕಗಳು ರಾರಾಜಿಸುವ ಭರವಸೆ ಇರಲಿಲ್ಲ.

ಎಲ್ಲಿಯವರೆಗೆ ಕನ್ನಡಿಗರಿಗೆ ಕನ್ನಡ ಭಾಷೆಯ ಮೇಲೆ ಅಭಿಮಾನ, ಪ್ರೀತಿ, ಗೌರವ, ಕಾಳಜಿ ಇರುವುದಿಲ್ಲವೋ ಅಲ್ಲಿಯವರೆಗೆ ಇಂಗ್ಲಿಷ್‌ ನಾಮಫಲಕಗಳೇ ಕಂಗೊಳಿಸುತ್ತಿರುತ್ತವೆ. ಇನ್ನೊಂದು ನೋವಿನ ಸಂಗತಿ ಎಂದರೆ, ಮನೆ ಬಾಡಿಗೆ ಕೊಡಲು ಉದ್ದೇಶಿಸಿದ ಮನೆ ಮಾಲೀಕರು ಹಾಕುವುದು ‘ಟು-ಲೆಟ್’ ಎಂಬ ಇಂಗ್ಲಿಷ್ ಬೋರ್ಡನ್ನೇ ವಿನಾ ‘ಮನೆ ಬಾಡಿಗೆಗಿದೆ’ ಎಂಬ ಬೋರ್ಡನ್ನಲ್ಲ. ಇಂಗ್ಲಿಷ್‌ ನಾಮಫಲಕಗಳಿಗೆ ಮಸಿ ಬಳಿಯುವುದಕ್ಕೆ ಬದಲು ಕನ್ನಡಿಗರ ಮನಸ್ಸಿನಲ್ಲಿರುವ ಇಂತಹ ಮಸಿಯನ್ನು ಮೊದಲು ತೊಳೆಯಬೇಕಿದೆ.

–ಸಿ.ಚಿಕ್ಕತಿಮ್ಮಯ್ಯ ಹಂದನಕೆರೆ, ಬೆಂಗಳೂರು