ನಾನೊಬ್ಬ ಸಾಮಾನ್ಯ ರೈತ. ನನ್ನ ಮೇಲೆ ‘ಪೆಗಾಸಸ್’ ಕುತಂತ್ರಾಂಶ ಪ್ರಯೋಗಿಸಿ ನೋಡಿ, ನಿಮಗೆ ತಿಳಿಯುತ್ತದೆ... ನನ್ನ ಅಂಗೈಯಗಲದ ಜಮೀನಿನ ಖಾತೆ ಕಿರ್ದಿಗಾಗಿ ಅದೆಷ್ಟು ಬಾರಿ ತಹಶೀಲ್ದಾರ್ ಕಚೇರಿಗೆ ಎಡತಾಕಿದ್ದೇನೆಂದು... ಬಿತ್ತನೆ ಬೀಜಕ್ಕಾಗಿ ಕಿಕ್ಕಿರಿದ ಸಾಲಿನಲ್ಲಿ ನಿಂತು, ಲಾಠಿ ಪ್ರಹಾರವಾದಾಗ ಯಾವ್ಯಾವ ಗಲ್ಲಿಗೆ ಬಿದ್ದು ಬಚಾವಾದೆನೆಂದು... ಅದೆಷ್ಟು ಬಾರಿ ಬೆಳೆಸಾಲ ಕೇಳಲು ಕಂಡ ಕಂಡ ಬ್ಯಾಂಕುಗಳಿಗೆ ಅಲೆದಿದ್ದೇನೆಂದು... ಸರಿರಾತ್ರಿಗಳಲ್ಲಿ ಬಂದುಹೋಗುವ ಕರೆಂಟನ್ನು ಕಾಯ್ದುಕೊಂಡು ನಿಶಾಚರಿಯಂತೆ ಅಂಡಲೆಯುತ್ತಿದ್ದೇನೆಂದು... ಬೆಳೆದ ಬೆಳೆಗೆ ಬೆಲೆ ಇಲ್ಲದಾದಾಗ ಬಿಸಿಲು ಬೆಳದಿಂಗಳ ಬೀದಿಯಲಿ ಮಾರಾಟ ಮಾಡಲು ಕೂಗಿ ಕೂಗಿ ದನಿ ಕಳೆದುಕೊಂಡಿದ್ದೇನೆಂದು ತಿಳಿಯಲು... ನನ್ನ ಮೇಲೊಮ್ಮೆ ಪ್ರಯೋಗಿಸಿ ನೋಡಿ...ಪೆಗಾಸಸ್.
