ಆದರೆ ನಿಜವಾದ ಮತಾಂತರವೆಂದರೆ, ವ್ಯಕ್ತಿ ತನ್ನ ಆತ್ಮಸಾಕ್ಷಿಗೆ ಅನುಗುಣವಾಗಿ ನಡೆದುಕೊಂಡು ಧರ್ಮವನ್ನು ಬದಲಾಯಿಸುವುದಾಗಿದೆ. ಹಿಂದೂ ಧರ್ಮದಲ್ಲಿನ ಅಸ್ಪೃಶ್ಯತೆ, ಅಸಮಾನತೆ, ತಾರತಮ್ಯ, ಅನಾದರ ಮುಂತಾದ ಲೋಪಗಳೇ ಮತಾಂತರಕ್ಕೆ ಕಾರಣ. ಅವು ಅಳಿದರೆ, ಧರ್ಮವನ್ನು ಬದಲಾಯಿಸುವ ಪ್ರಶ್ನೆಯೇ ಉದ್ಭವಿಸುವುದಿಲ್ಲ. ದಲಿತರ ಬಗೆಗೆ ಧರ್ಮದಲ್ಲಿ ಬಲವಾಗಿ ಬೀಡುಬಿಟ್ಟಿರುವ ತಾರತಮ್ಯ ಧೋರಣೆಯಂತಹ ದೌರ್ಬಲ್ಯಗಳು ನಿರ್ಮೂಲಗೊಳ್ಳದ ಹೊರತು, ಮತಾಂತರ ಪ್ರಕ್ರಿಯೆಗಳು ಸದಾ ಸದ್ದು ಮಾಡುತ್ತಲೇ ಇರುತ್ತವೆ. ಮೊದಲು ತಮ್ಮ ಧರ್ಮದಲ್ಲಿನ ದೋಷಗಳನ್ನು ಸರಿಪಡಿಸಿಕೊಳ್ಳದೆ ಬೇರೆ ಧರ್ಮವನ್ನು ತೆಗಳುವುದು ಸರಿಯಲ್ಲ.