‘ಮತದಾರನಾಗುವುದು ಪ್ರಯಾಸ’ ಎಂಬ ಸುದ್ದಿಯನ್ನು (ಪ್ರ.ವಾ., ಜ. 13; 50 ವರ್ಷಗಳ ಹಿಂದೆ) ಓದಿದಾಗ, ಆ ದಿನಗಳಲ್ಲಿ ಮತದಾರನಾಗಿ ಹೆಸರು ನೋಂದಾಯಿಸಲು ನಾಗರಿಕರು ಪಡುತ್ತಿದ್ದ ಪಡಿಪಾಟಲಿನ ಅರಿವಾಗುತ್ತದೆ. ಆಗ ಮತದಾರನಾಗಿ ನೋಂದಾಯಿಸಿಕೊಳ್ಳಲು ಹತ್ತು ಪೈಸೆ ಪಾವತಿಸುವ ಅಗತ್ಯ ಏನಿತ್ತೋ ತಿಳಿಯದು. ನೋಂದಣಿ ಮಾಡಿಕೊಳ್ಳಬೇಕಾದ ಅಧಿಕಾರಿಗಳನ್ನು ಹಿಡಿಯಲು ನಾಗರಿಕರು ಪದೇಪದೇ ಸರ್ಕಾರಿ ಕಚೇರಿಗೆ ಎಡತಾಕುತ್ತಿದ್ದುದನ್ನು ನೋಡಿದರೆ, ನೌಕರಶಾಹಿಯ ಮನೋಭಾವದಲ್ಲಿ ಅಂದಿಗೂ ಇಂದಿಗೂ ಏನೂ ವ್ಯತ್ಯಾಸವಿಲ್ಲ ಎನಿಸುತ್ತದೆ.
