ಆರ್ಚರ್ ದಾಳಿಯಲ್ಲಿ ಪಂತ್ ರಿವರ್ಸ್-ಸ್ವೀಪ್ ಸಿಕ್ಸರ್; ಬೆರಗಾದ ಕ್ರಿಕೆಟ್ ಲೋಕ

ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಮೊದಲ ಟಿ20 ಅಂತರ ರಾಷ್ಟ್ರೀಯಪಂದ್ಯದಲ್ಲಿ ಪಂತ್ ಮೋಡಿ ಮಾಡಿದರು. ಟಾಸ್ ಸೋತು ಮೊದಲು ಬ್ಯಾಟಿಂಗ್‌ಗಿಳಿಸಲ್ಪಟ್ಟ ಭಾರತ ಕಳಪೆ ಆರಂಭವನ್ನು ಪಡೆದುಕೊಂಡಿತ್ತು.

ಇದನ್ನೂ ಓದಿ:ರನ್ ಬರ ಎದುರಿಸುತ್ತಿರುವ 'ರನ್ ಮೆಷಿನ್'; ಕೊಹ್ಲಿ ಮತ್ತೆ ಶೂನ್ಯಕ್ಕೆ ಔಟ್!

3 ರನ್ ಗಳಿಸುವಷ್ಟರಲ್ಲಿ ಕೆಎಲ್ ರಾಹುಲ್ ಹಾಗೂ ನಾಯಕ ವಿರಾಟ್ ಕೊಹ್ಲಿ ವಿಕೆಟ್‌ಗಳನ್ನು ಕಳೆದುಕೊಂಡಿತ್ತು. ಈ ಹಂತದಲ್ಲಿ ಬ್ಯಾಟಿಂಗ್ ಕ್ರಮಾಂಕದಲ್ಲಿ ಬಡ್ತಿ ಪಡೆದು ಬಂದ ರಿಷಭ್ ಪಂತ್, ಟೆಸ್ಟ್ ಸರಣಿಯಲ್ಲಿನ ಉತ್ತಮ ಫಾರ್ಮ್ ಮುಂದುವರಿಸಿದರು.

ಜೋಫ್ರಾ ಆರ್ಚರ್ ಎಸೆದ ಇನ್ನಿಂಗ್ಸ್‌ನ ನಾಲ್ಕನೇ ಓವರ್‌ನಲ್ಲಿ ರಿವರ್ಸ್ ಸ್ವೀಪ್ ಮೂಲಕ ರಿಷಭ್ ಪಂತ್ ಸಿಕ್ಸರ್ ಬಾರಿಸಿದರು. ಅತಿ ಒತ್ತಡದ ಪವರ್ ಪ್ಲೇ ಸನ್ನಿವೇಶದಲ್ಲೂ ಪಂತ್ ಆಯ್ಕೆ ಮಾಡಿಕೊಂಡಿರುವ ಹೊಡೆತದಭಂಗಿಯು ಎಲ್ಲರನ್ನು ನಿಬ್ಬೇರಗಾಗಿಸಿದೆ.

ಕ್ರಿಕೆಟ್ ಪಂಡಿತರು ಪಂತ್ ಧೈರ್ಯವನ್ನು ಮೆಚ್ಚಿದ್ದಾರೆ. ಇತ್ತೀಚೆಗಷ್ಟೇ ಇಂಗ್ಲೆಂಡ್ ವಿರುದ್ಧ ನಡೆದ ಟೆಸ್ಟ್ ಸರಣಿಯಲ್ಲಿ ರಿಷಭ್ ಪಂತ್ ಇದಕ್ಕೆ ಸಮಾನವಾದ ರೀತಿಯಲ್ಲಿ ಸಿಕ್ಸರ್ ಸಿಡಿಸಿದ್ದರು.

ಇದನ್ನೂ ಓದಿ:IND vs ENG 1st T20I: ಅಯ್ಯರ್ ಫಿಫ್ಟಿ; ಇಂಗ್ಲೆಂಡ್‌ಗೆ 125 ರನ್ ಗೆಲುವಿನ ಗುರಿ

ಅಂದು ಹೊಸ ಚೆಂಡಿನೊಂದಿಗೆ ದಾಳಿಗಿಳಿದ ಟೆಸ್ಟ್ ಕ್ರಿಕೆಟ್‌ನಲ್ಲಿ 600ಕ್ಕೂ ಹೆಚ್ಚು ವಿಕೆಟ್ ಪಡೆದಿರುವ ಅನುಭವಿ ವೇಗಿ ಜೇಮ್ಸ್ ಆ್ಯಂಡರ್ಸನ್ ದಾಳಿಯಲ್ಲಿ ರಿವರ್ಸ್ ಸ್ಕೂಪ್ ಮೂಲಕ ಸಿಕ್ಸರ್ ಬಾರಿಸಿದ್ದರು.

ಯಾವುದೇ ಪರಿಸ್ಥಿತಿಯಲ್ಲೂ ನಿರ್ಭೀತಿಯ ಕ್ರಿಕೆಟ್ ಆಡುವ ಪಂತ್ ಬ್ಯಾಟಿಂಗ್ ಶೈಲಿಯು ಕ್ರೀಡಾಭಿಮಾನಿಗಳ ಪ್ರೀತಿಗೂ ಕಾರಣವಾಗಿದೆ.

ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ ಕೂಡಾ ತನ್ನ ಟ್ವಿಟರ್ ಪುಟದಲ್ಲಿ ಈ ವಿಡಿಯೊ ಹಂಚಿಕೊಂಡಿದ್ದು, ನೀವು ಪಂತ್ ಆಗಿರದ ಹೊರತು ಇದನ್ನು ಅನುಕರಿಸಬಾರದು ಎಂಬ ಎಚ್ಚರಿಕಾ ಸಂದೇಶವನ್ನು ನೀಡಿದೆ.

ಇಂಗ್ಲೆಂಡ್ ಮಾಜಿ ಆಟಗಾರ ಕೆವಿನ್ ಪೀಟರ್ಸನ್ ಅಂತೂ, ಕ್ರಿಕೆಟ್ ಜಗತ್ತಿನಲ್ಲಿ ಆಡಲಾದ ಅತ್ಯಂತ ಶ್ರೇಷ್ಠ ಹೊಡೆತ ಎಂದು ಹಾಡಿ ಹೊಗಳಿದ್ದಾರೆ.