ವಿಜಯ್ ಹಜಾರೆ ಟ್ರೋಫಿ: ನಾಲ್ಕರ ಘಟ್ಟದಲ್ಲಿ ಕರ್ನಾಟಕ–ಮುಂಬೈ ಹಣಾಹಣಿ

ಮಂಗಳವಾರ ಪಾಲಂ ಏರ್‌ಫೋರ್ಸ್ ಕ್ರೀಡಾಂಗಣದಲ್ಲಿ ನಡೆದ ಕ್ವಾರ್ಟರ್‌ಫೈನಲ್‌ನಲ್ಲಿ ಟಾಸ್ ಗೆದ್ದ ಸೌರಾಷ್ಟ್ರ ತಂಡವು 50 ಓವರ್‌ಗಳಲ್ಲಿ 5 ವಿಕೆಟ್‌ಗಳಿಗೆ 284 ರನ್‌ ಗಳಿಸಿತು. ಅದಕ್ಕುತ್ತರವಾಗಿ ಮುಂಬೈ ತಂಡವು 41.5 ಓವರ್‌ಗಳಲ್ಲಿ 1 ವಿಕೆಟ್‌ಗೆ 285 ರನ್ ಗಳಿಸಿತು. 9 ವಿಕೆಟ್‌ಗಳ ಜಯ ದಾಖಲಿಸಿತು.

ಮುಂಬೈ ತಂಡದ ನಾಯಕ ಪೃಥ್ವಿ ಶಾ (ಔಟಾಗದೆ 185; 123ಎಸೆತ, 21ಬೌಂಡರಿ, 7ಸಿಕ್ಸರ್) ಅವರು ಟೂರ್ನಿಯಲ್ಲಿ ಮೂರನೇ ಶತಕ ಹೊಡೆದರು. ಅವರು ಮೊದಲ ವಿಕೆಟ್ ಜೊತೆಯಾಟದಲ್ಲಿ ಯಶಸ್ವಿ ಜೈಸ್ವಾಲ್ (75; 104ಎಸೆತ, 10ಬೌಂಡರಿ, 1ಸಿಕ್ಸರ್) ಅವರೊಂದಿಗೆ 238 ರನ್‌ ಸೇರಿಸಿದರು.

ಸೋಮವಾರ ನಡೆದಿದ್ದ ಕ್ವಾರ್ಟರ್‌ಫೈನಲ್‌ನಲ್ಲಿ ಕರ್ನಾಟಕ ತಂಡವು ಕೇರಳದ ವಿರುದ್ಧ ಜಯಿಸಿತ್ತು. ಪಂದ್ಯದಲ್ಲಿ ಆರಂಭಿಕ ಜೋಡಿ ಸಮರ್ಥ್ ಮತ್ತು ದೇವದತ್ತ ಪಡಿಕ್ಕಲ್ ಶತಕಗಳನ್ನು ಗಳಿಸಿದ್ದರು.

ಉತ್ತರಪ್ರದೇಶಕ್ಕೆ ಜಯ: ಮಧ್ಯಮಕ್ರಮಾಂಕದ ಬ್ಯಾಟ್ಸ್‌ಮನ್ ಉಪೇಂದ್ರ ಯಾದವ್ (112; 101ಎ, 11ಬೌಂ, 2ಸಿ) ಅವರ ಅಮೋಘ ಶತಕದ ಬಲದಿಂದ ಉತ್ತರಪ್ರದೇಶ ತಂಡವು ಎಂಟರ ಘಟ್ಟದ ಇನ್ನೊಂದು ಪಂದ್ಯದಲ್ಲಿ 48 ರನ್‌ಗಳಿಂದ ದೆಹಲಿ ತಂಡವನ್ನು ಮಣಿಸಿತು. ಸೆಮಿಫೈನಲ್‌ನಲ್ಲಿ ಉತ್ತರ ಪ್ರದೇಶ ತಂಡವು ಗುಜರಾತ್ ಎದುರು ಕಣಕ್ಕಿಳಿಯಲಿದೆ.

ಸಂಕ್ಷಿಪ್ತ ಸ್ಕೋರು-

ಸೌರಾಷ್ಟ್ರ: 50 ಓವರ್‌ಗಳಲ್ಲಿ 5ಕ್ಕೆ 284 (ಅವಿ ಬಾರೋಟ್ 37, ಸ್ನೆಲ್ ಪಟೇಲ್ 30, ವಿಶ್ವರಾಜ್ ಜಡೇಜ 53, ಸಮರ್ಥ್ ವ್ಯಾಸ್ ಔಟಾಗದೆ 90, ಚಿರಾಗ್ ಜಾನಿ ಔಟಾಗದೆ 53, ಶಮ್ಸ್‌ ಮುಲಾನಿ 51ಕ್ಕೆ2)

ಮುಂಬೈ : 41.5 ಓವರ್‌ಗಳಲ್ಲಿ 1 ವಿಕೆಟ್‌ಗೆ 285 (ಪೃಥ್ವಿ ಶಾ ಔಟಾಗದೆ 185, ಯಶಸ್ವಿ ಜೈಸ್ವಾಲ್ 75, ಆದಿತ್ಯ ತಾರೆ ಔಟಾಗದೆ 20) ಫಲಿತಾಂಶ: ಮುಂಬೈ ತಂಡಕ್ಕೆ 9 ವಿಕೆಟ್‌ಗಳ ಜಯ.

ಉತ್ತರಪ್ರದೇಶ: 50 ಓವರ್‌ಗಳಲ್ಲಿ 7ಕ್ಕೆ280 (ಕರಣ್ ಶರ್ಮಾ 83, ಉಪೇಂದ್ರ ಯಾದವ್ 112, ಸಮೀರ್‌ ಚೌಧರಿ ಔಟಾಗದೆ 43, ಪ್ರದೀಪ್ ಸಂಗ್ವಾನ್ 49ಕ್ಕೆ2, ಸಮರಜೀತ್ ಸಿಂಗ್ 51ಕ್ಕೆ2)

ದೆಹಲಿ: 48.1 ಓವರ್‌ಗಳಲ್ಲಿ 234 (ಹಿಮ್ಮತ್ ಸಿಂಗ್ 39, ಲಾಲಿ ಯಾದವ್ 61, ಅನುಜ್ ರಾವತ್ 47, ಪ್ರದೀಪ್ ಸಂಗ್ವಾನ್ 26, ಯಶ್ ದಯಾಳ್ 53ಕ್ಕೆ3, ಅಕೀಬ್ ಖಾನ್ 60ಕ್ಕೆ2, ಅಕ್ಷದೀಪ್ ನಾಥ್ 29ಕ್ಕೆ2) ಫಲಿತಾಂಶ: ಉತ್ತರಪ್ರದೇಶ ತಂಡಕ್ಕೆ 48 ರನ್‌ಗಳ ಜಯ.

ಸೆಮಿಫೈನಲ್

ಗುಜರಾತ್– ಉತ್ತರಪ್ರದೇಶ (ಸ್ಥಳ: ಅರುಣ್ ಜೇಟ್ಲಿ ಕ್ರೀಡಾಂಗಣ, ದೆಹಲಿ)

ಕರ್ನಾಟಕ–ಮುಂಬೈ (ಸ್ಥಳ: ಪಾಲಂ ಎ ಕ್ರೀಡಾಂಗಣ, ದೆಹಲಿ)

ಮಾರ್ಚ್‌ 11 ರಂದು ಬೆಳಿಗ್ಗೆ 9ರಿಂದ.