ಕ್ರೈಸ್ಟ್‌ಚರ್ಚ್‌: ಎಡಗೈ ಬ್ಯಾಟ್ಸ್‌ಮನ್‌ ಲಿಯೊ ಕಾರ್ಟರ್‌ ಅವರು ಒಂದೇ ಓವರ್‌ನಲ್ಲಿ ಆರು ಸಿಕ್ಸರ್‌ ಸಿಡಿಸಿ ಕ್ರಿಕೆಟ್‌ ಲೋಕದ ಗಮನ ಸೆಳೆದಿದ್ದಾರೆ.
ಇಲ್ಲಿನ ಹೇಗ್ಲೆ ಓವಲ್‌ ಮೈದಾನದಲ್ಲಿ ನಡೆದ ಸೂಪರ್ ಸ್ಮ್ಯಾಷ್‌ ದೇಶಿ ಟ್ವೆಂಟಿ–20 ಟೂರ್ನಿಯಲ್ಲಿ ಕಾರ್ಟರ್‌ ಅವರಿಂದ ಈ ಸಾಧನೆ ಮೂಡಿಬಂದಿದೆ.
ಕ್ಯಾಂಟರ್‌ಬರಿ ಕಿಂಗ್ಸ್‌ ತಂಡದ ಕಾರ್ಟರ್‌, ಭಾನುವಾರ ನಡೆದ ನಾರ್ತರ್ನ್‌ ನೈಟ್ಸ್‌ ಎದುರಿನ ಪಂದ್ಯದಲ್ಲಿ ಗರ್ಜಿಸಿದರು.
ಎಡಗೈ ಸ್ಪಿನ್ನರ್‌ ಆ್ಯಂಟೊನ್‌ ಡೇವ್‌ಸಿಚ್‌ ಹಾಕಿದ ಪಂದ್ಯದ 16ನೇ ಓವರ್‌ನ ಆರು ಎಸೆತಗಳನ್ನೂ ಅವರು ಸಿಕ್ಸರ್‌ಗೆ ಅಟ್ಟಿ ಈ ದಾಖಲೆ ಬರೆದ ನ್ಯೂಜಿಲೆಂಡ್‌ನ ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.
ಈ ಸಾಧನೆ ಮಾಡಿದ ವಿಶ್ವದ ಒಟ್ಟಾರೆ ಏಳನೇ ಬ್ಯಾಟ್ಸ್‌ಮನ್‌ ಎಂಬ ಶ್ರೇಯವೂ ಅವರದ್ದಾಯಿತು. ಟ್ವೆಂಟಿ–20 ಮಾದರಿಯಲ್ಲಿ ಈ ಸಾಧನೆ ಮಾಡಿದ ನಾಲ್ಕನೇ ಬ್ಯಾಟ್ಸ್‌ಮನ್‌ ಅವರಾದರು. ಯುವರಾಜ್‌ ಸಿಂಗ್ (ಭಾರತ; 2007), ರಾಸ್‌ ವೈಟ್‌ಲೀ (ಇಂಗ್ಲೆಂಡ್‌; 2017) ಮತ್ತು ಹಜರತ್‌ಉಲ್ಲಾ ಜಜಾಯ್‌ (ಅಫ್ಗಾನಿಸ್ತಾನ; 2018) ಅವರು ಮೊದಲು ಈ ದಾಖಲೆ ನಿರ್ಮಿಸಿದ್ದರು.
ಭಾರತದ ರವಿಶಾಸ್ತ್ರಿ ಹಾಗೂ ವೆಸ್ಟ್‌ ಇಂಡೀಸ್‌ನ ಗ್ಯಾರಿ ಸೋಬರ್ಸ್‌ ಅವರು ಪ್ರಥಮ ದರ್ಜೆಯಲ್ಲಿ, ದಕ್ಷಿಣ ಆಫ್ರಿಕಾದ ಹರ್ಷಲ್‌ ಗಿಬ್ಸ್‌ ಅವರು ಅಂತರರಾಷ್ಟ್ರೀಯ ಏಕದಿನ ಮಾದರಿಯ ಪಂದ್ಯದಲ್ಲಿ ಆರು ಸಿಕ್ಸರ್‌ ಸಿಡಿಸಿದ್ದರು.
25 ವರ್ಷದ ಕಾರ್ಟರ್‌, ಈ ಪಂದ್ಯದಲ್ಲಿ 29 ಎಸೆತಗಳಲ್ಲಿ 70ರನ್‌ ಬಾರಿಸಿದರು. ಟ್ವೆಂಟಿ–20ಯಲ್ಲಿ ಅವರು ದಾಖಲಿಸಿದ ಚೊಚ್ಚಲ ಅರ್ಧಶತಕ ಇದಾಗಿದೆ. ಅವರ ಸ್ಫೋಟಕ ಆಟದ ಬಲದಿಂದ ಕ್ಯಾಂಟರ್‌ಬರಿ ತಂಡ ನಾರ್ತರ್ನ್‌ ನೈಟ್ಸ್‌ ನೀಡಿದ್ದ 220ರನ್‌ಗಳ ಗೆಲುವಿನ ಗುರಿಯನ್ನು ಏಳು ಎಸೆತಗಳು ಬಾಕಿ ಇರುವಂತೆಯೇ ಕ್ರಮಿಸಿತು.
