ಸೋಮವಾರ, ಜುಲೈ 26, 2021
21 °C

ಟಿ20: ವಿಂಡೀಸ್‌ಗೆ ಮಣಿದ ಆಸ್ಟ್ರೇಲಿಯಾ

ಎಪಿ Updated:

ಅಕ್ಷರ ಗಾತ್ರ : | |

Prajavani

ಗ್ರಾಸ್‌ ಐಲೆಟ್‌, ಸೇಂಟ್ ಲೂಸಿಯಾ: ಬ್ಯಾಟಿಂಗ್‌ನಲ್ಲಿ ದಿಢೀರ್ ವೈಫಲ್ಯ ಅನುಭವಿಸಿದ ಆಸ್ಟ್ರೇಲಿಯಾ ತಂಡವು ವೆಸ್ಟ್ ಇಂಡೀಸ್‌ ಎದುರಿನ ಮೊದಲ ಟ್ವೆಂಟಿ ಪಂದ್ಯದಲ್ಲಿ 18 ರನ್‌ಗಳಿಂದ ಸೋತಿತು.

ಶುಕ್ರವಾರ ಇಲ್ಲಿ ನಡೆದ ಐದು ಪಂದ್ಯಗಳ ಸರಣಿಯ ಮೊದಲ ಹಣಾಹಣಿಯಲ್ಲಿ ಮೊದಲು ಬ್ಯಾಟ್‌ ಮಾಡಿದ ಆತಿಥೇಯ ವಿಂಡೀಸ್ ಆರು ವಿಕೆಟ್‌ಗೆ 145 ರನ್ ಕಲೆಹಾಕಿತು. ಆ್ಯಂಡ್ರೆ ರಸೆಲ್‌ (51, 28 ಎಸೆತ) ಹಾಗೂ ಲೆಂಡ್ಲ್ ಸಿಮನ್ಸ್ (27) ಅವರು ತಂಡವು ಸವಾಲಿನ ಮೊತ್ತ ಗಳಿಸಲು ಕಾರಣರಾದರು.

ಗುರಿ ಬೆನ್ನತ್ತಿದ ಆಸ್ಟ್ರೇಲಿಯಾ ಒಂದು ಹಂತದಲ್ಲಿ 3 ವಿಕೆಟ್‌ಗೆ 70 ರನ್‌ ಗಳಿಸಿ ಜಯದ ಹಾದಿಯಲ್ಲಿತ್ತು. ಬಳಿಕ 19 ರನ್‌ಗಳಿಗೆ ಆರು ವಿಕೆಟ್‌ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಅಂತಿಮವಾಗಿ 16 ಓವರ್‌ಗಳಲ್ಲಿ 127 ರನ್‌ ಗಳಿಸಿ ಎಲ್ಲ ವಿಕೆಟ್ ಕಳೆದುಕೊಂಡಿತು. ವೆಸ್ಟ್ ಇಂಡೀಸ್ ತಂಡದ ಒಬೆದ್‌ ಮೆಕಾಯ್‌ (26ಕ್ಕೆ 4) ಹಾಗೂ ಹೇಡನ್ ವಾಲ್ಷ್‌ (23ಕ್ಕೆ 3) ಪ್ರವಾಸಿ ತಂಡದ ಕುಸಿತಕ್ಕೆ ಕಾರಣರಾದರು.

ಆಸ್ಟ್ರೇಲಿಯಾ ಪರ ಮಿಚೆಲ್ ಮಾರ್ಷ್‌ ದಾಖಲಿಸಿದ ಅರ್ಧಶತಕ (51) ವ್ಯರ್ಥವಾಯಿತು.

ಈ ಪಂದ್ಯ ಆರಂಭಕ್ಕೂ ಮೊದಲು ಎರಡೂ ತಂಡಗಳ ಆಟಗಾರರು, ಜನಾಂಗೀಯ ನಿಂದನೆ ಮತ್ತು ತಾರತಮ್ಯ ವಿರೋಧಿ ಅಭಿಯಾನಕ್ಕೆ ಮೊಣಕಾಲೂರಿ ನಿಲ್ಲುವ ಮೂಲಕ ಬೆಂಬಲ ವ್ಯಕ್ತಪಡಿಸಿದರು.

ಸಂಕ್ಷಿಪ್ತ ಸ್ಕೋರ್‌: ವೆಸ್ಟ್ ಇಂಡೀಸ್: 20 ಓವರ್‌ಗಳಲ್ಲಿ 6 ವಿಕೆಟ್‌ಗೆ 145 (ಆ್ಯಂಡ್ರೆ ರಸೆಲ್‌ 51, ಲೆಂಡ್ಲ್ ಸಿಮನ್ಸ್ 27, ಶಿಮ್ರಾನ್ ಹೆಟ್ಮೆಯರ್‌ 20; ಜೋಶ್ ಹ್ಯಾಜಲ್‌ವುಡ್‌ 12ಕ್ಕೆ 3, ಮಿಚೆಲ್ ಮಾರ್ಷ್‌ 26ಕ್ಕೆ 2) ಆಸ್ಟ್ರೇಲಿಯಾ: 16 ಓವರ್‌ಗಳಲ್ಲಿ 127 (ಮಿಚೆಲ್ ಮಾರ್ಷ್‌ 51, ಮ್ಯಾಥ್ಯು ವೇಡ್‌ 33; ಒಬೆದ್‌ ಮೆಕಾಯ್‌ 26ಕ್ಕೆ 4, ಹೇಡನ್ ವಾಲ್ಷ್‌ 23ಕ್ಕೆ 3, ಫ್ಯಾಬಿಯೆನ್ ಅಲೆನ್‌ 24ಕ್ಕೆ 2). ಫಲಿತಾಂಶ: ವೆಸ್ಟ್ ಇಂಡೀಸ್ ತಂಡಕ್ಕೆ 18 ರನ್‌ಗಳ ಜಯ.

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು