ಮೊದಲ 10 ನಿಮಿಷಗಳಲ್ಲಿ ಸಮ ಬಲದ ಹೋರಾಟ ನಡೆಯಿತು. ಪಂದ್ಯ ಮುಂದುವರಿದಂತೆ ಈಕ್ವೆಡಾರ್ ಹಿಡಿತ ಬಿಗಿಗೊಳಿಸಿತು. 16ನೇ ನಿಮಿಷದಲ್ಲಿ ಗೋಲು ಗಳಿಸಲು ಮುನ್ನುಗ್ಗಿದ ವಲೆನ್ಸಿಯಾ ಅವರನ್ನು ಎದುರಾಳಿ ಗೋಲ್ಕೀಪರ್ ಸಾದ್ ಅಲ್ಶೀಬ್ ಕೆಳಕ್ಕೆ ಬೀಳಿಸಿದರು. ಅದಕ್ಕೆ ರೆಫರಿ ಪೆನಾಲ್ಟಿ ಅವಕಾಶ ನೀಡಿದರು. ಪೆನಾಲ್ಟಿ ಕಿಕ್ನಲ್ಲಿ ಎನೆರ್ ಗೋಲು ಗಳಿಸಿ ತಂಡಕ್ಕೆ ಮುನ್ನಡೆ ತಂದುಕೊಟ್ಟರು. 31ನೇ ನಿಮಿಷದಲ್ಲಿ ಎನೆರ್ ಎರಡನೇ ಗೋಲು ಗಳಿಸಿದರು. ಏಂಜೆಲೊ ಪ್ರೆಸಿಯಾಡೊ ನೀಡಿದ ಕ್ರಾಸ್ನಲ್ಲಿ ಚೆಂಡನ್ನು ಹೆಡ್ ಮಾಡಿ ಗುರಿ ಸೇರಿಸಿದರು. ಕತಾರ್ ತಂಡದ ಸ್ಟಾರ್ ಆಟಗಾರ ಅಲ್ಮೋಜ್ ಅಲಿ ಮತ್ತು ಮೊಹಮ್ಮದ್ ಮುಂತರಿ ಅವರಿಗೆ ಗೋಲು ಗಳಿಸಲು ಉತ್ತಮ ಅವಕಾಶ ದೊರೆತರೂ ಚೆಂಡನ್ನು ಗುರಿ ಸೇರಿಸಲು ವಿಫಲರಾದರು.