13ನೇ ನಿಮಿಷದಲ್ಲಿ ಭಾರತಕ್ಕೆ ಗೋಲು ಗಳಿಸುವ ಅವಕಾಶ ಸಿಕ್ಕಿತ್ತು. ಚೆಂಡಿನೊಂದಿಗೆ ಎದುರಾಳಿ ಆವರಣ ಪ್ರವೇಶಿಸಿದ ಅನಿರುದ್ಧ್ ಥಾಪಾ, ಅದನ್ನು ಪ್ರೀತಮ್ ಕೋಟಾಲ್ ಅವರತ್ತ ತಳ್ಳಿದರು. ಗೋಲು ಪೆಟ್ಟಿಗೆ ಬಲಭಾಗದಿಂದ ಪ್ರೀತಮ್ ಬಾರಿಸಿದ ಚೆಂಡನ್ನು ಚೀನಾ ತಂಡದ ಗೋಲ್ಕೀಪರ್ ಅಮೋಘ ರೀತಿಯಲ್ಲಿ ತಡೆದರು. 15ನೇ ನಿಮಿಷದಲ್ಲಿ ಗಾವೊ ಲಿನ್ ಅವರ ‘ಫ್ರೀ ಹೆಡರ್’ ಅನ್ನು ಭಾರತದ ಗೋಲ್ಕೀಪರ್ ಗುರುಪ್ರೀತ್ ಸಿಂಗ್ ಸಂಧು ತಡೆದರು. 17ನೇ ನಿಮಿಷದಲ್ಲಿ ಲಭಿಸಿದ ಫ್ರೀ ಕಿಕ್ನಲ್ಲಿ ಚೆಂಡನ್ನು ಗುರಿ ಸೇರಿಸಲು ಸುನಿಲ್ ಚೆಟ್ರಿ ವಿಫಲರಾದರು. ಚೆಟ್ರಿ ಒದ್ದ ಚೆಂಡು ಚೀನಾ ತಂಡದ ಗೋಲು ಪೆಟ್ಟಿಗೆಯ ಕಂಬಕ್ಕೆ ಬಡಿದು ಅಂಗಳದ ಆಚೆ ಬಿತ್ತು.