Paris | 4x100 ಮೀ. ರಿಲೆಯಲ್ಲಿ ಭಾರತ ಪುರುಷರ ಹಾಗೂ ಮಹಿಳೆಯರ ತಂಡಕ್ಕೆ ನಿರಾಸೆ

ಪ್ಯಾರಿಸ್‌: ಭಾರತ ಪುರುಷರ  4x400 ಮೀ. ರಿಲೆ ತಂಡವು ಪ್ಯಾರಿಸ್‌ ಒಲಿಂಪಿಕ್ಸ್‌ನಲ್ಲಿ ತನ್ನ ಮೇಲಿದ್ದ ನಿರೀಕ್ಷೆಯನ್ನು ಜೀವಂತವಾಗಿರಿಸುವಲ್ಲಿ ವಿಫಲವಾಯಿತು. ಶುಕ್ರವಾರ ನಡೆದ ಹೀಟ್‌ ರೇಸ್‌ನಲ್ಲಿ ಒಟ್ಟಾರೆ 10ನೇ ಸ್ಥಾನ ಪಡೆದ ತಂಡಕ್ಕೆ ಅಂತಿಮ ಸುತ್ತಿಗೇರಲು ಸಾಧ್ಯವಾಗಲಿಲ್ಲ.

ಮೊಹಮ್ಮದ್ ಅನಾಸ್ ಯಾಹಿಯಾ, ಮೊಹಮ್ಮದ್ ಅಜ್ಮಲ್‌, ಅಮೊಜ್‌  ಜೇಕಬ್‌ ಮತ್ತು ರಾಜೇಶ್‌ ರಮೇಶ್‌ ಅವರನ್ನೊಳಗೊಂಡ ತಂಡವು ಈ ಋತುವಿನ ಶ್ರೇಷ್ಠ 3 ನಿಮಿಷ 0.58 ಸೆಕೆಂಡುಗಳಲ್ಲಿ  ಗುರಿ ತಲುಪಿತು. ಆದರೆ ಇದರಿಂದ ಹೀಟ್‌ 2ರಲ್ಲಿ ನಾಲ್ಕನೇ ಸ್ಥಾನ ಮತ್ತು ಒಟ್ಟಾರೆ 16 ತಂಡಗಳಲ್ಲಿ 10ನೇ ಸ್ಥಾನ ಪಡೆಯಲು ಮಾತ್ರ ಸಾಧ್ಯವಾಯಿತು.

ಎರಡೂ ಹೀಟ್‌ಗಳಲ್ಲಿ ಅಗ್ರಸ್ಥಾನ ಪಡೆದ ಮೂರು ತಂಡಗಳು ಮತ್ತು ಅತ್ಯಂತ ವೇಗವಾಗಿ ಗುರಿ ತಲುಪಿದ ಮತ್ತೆರಡು ತಂಡಗಳು ಫೈನಲ್‌ಗೆ ಅರ್ಹತೆ ಪಡೆಯುತ್ತವೆ.

ಹೀಟ್‌ 2ರಲ್ಲಿ ಬೊಟ್ಸ್‌ವಾನಾ, ಬ್ರಿಟನ್‌, ಅಮೆರಿಕ ತಂಡಗಳು ಅಗ್ರಸ್ಥಾನ ಪಡೆದವು. ಜಪಾನ್‌ ನಾಲ್ಕನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತು. 

2023ರ ಬುಡಾಪೇಸ್ಟ್‌ ವಿಶ್ವ ಚಾಂಪಿಯನ್‌ಷಿಪ್‌ನಲ್ಲಿ 2 ನಿಮಿಷ 59.05 ಸೆಕೆಂಡುಗಳಲ್ಲಿ ಗುರಿ ತಲುಪಿರುವ ಭಾರತ ತಂಡ ಏಷ್ಯನ್‌ ದಾಖಲೆಯನ್ನು ಹೊಂದಿದೆ. ಈ ಕೂಟದಲ್ಲಿ ಭಾರತ ತಂಡ ಅಸಾಧಾರಣ ದಾಖಲೆ ಹೊಂದಿರುವ ಅಮೆರಿಕ ರಿಲೆ ತಂಡದೊಂದಿಗೆ ಸ್ಪರ್ಧಿಸಿತ್ತು.

ಪುರುಷರ ತಂಡ ಅಂತಿಮ ಸುತ್ತಿಗೆ ಅರ್ಹತೆ ‍ಪಡೆಯುತ್ತದೆ ಎಂದು ಭಾರತೀಯ ಅಥ್ಲೆಟಿಕ್ಸ್‌ ಫೆಡರೇಷನ್‌ ಅಪಾರ ನಿರೀಕ್ಷೆ ಹೊಂದಿತ್ತು.  ಆದರೆ ಅಂತಿಮವಾಗಿ ಅದು ಸಾಧ್ಯವಾಗಲಿಲ್ಲ.

ಮಹಿಳೆಯರ 4x400 ಮೀ ರಿಲೆ ತಂಡ ಕೂಡಾ ಅಂತಿಮ ಸುತ್ತಿಗೆ ಪ್ರವೇಶಿಸುವಲ್ಲಿ ವಿಫಲವಾಯಿತು. ಮೊದಲ ಸುತ್ತು ಹೀಟ್ಸ್‌ನಲ್ಲಿ ಸ್ಪರ್ಧಿಸಿದ್ದ ಒಟ್ಟಾರೆ 16 ತಂಡಗಳಲ್ಲಿ 15ನೇ ಸ್ಥಾನ ಪಡೆಯಿತು.

ವಿತ್ಯಾ ರಾಮರಾಜ್‌, ಜ್ಯೋತಿಕಾ ಶ್ರೀ ದಂಡಿ, ಎಂ.ಆರ್‌.ಪೂವಮ್ಮ ಮತ್ತು ಶುಭಾ ವೆಂಕಟೇಶನ್‌ ಅವರನ್ನೊಳಗೊಂಡ ತಂಡ ಹೀಟ್‌ನಲ್ಲಿ 3 ನಿಮಿಷ 32.51 ಸೆಕೆಂಡುಗಳಲ್ಲಿ ಗುರಿ ತಲುಪಿ ಕೊನೆಯ 8ನೇ ಸ್ಥಾನ ಪಡೆಯಿತು.