ಹಿನ್ನೋಟ–2021: ಪ್ಯಾರಾಲಿಂಪಿಕ್ಸ್‌ನಲ್ಲಿ ‘ಸುಹಾಸ’

ಐದು ಚಿನ್ನದೊಂದಿಗೆ 19 ಪದಕ ಗಳಿಸಿದ ಭಾರತ ಒಟ್ಟಾರೆ 24ನೇ ಸ್ಥಾನದಲ್ಲಿ ಮಿಂಚಿತು. ಈ ಹಿಂದೆ, 2016ರಲ್ಲಿ ಎರಡು ಚಿನ್ನ ಗೆದ್ದಿರುವುದು ಭಾರತದ ಗರಿಷ್ಠ ಸಾಧನೆಯಾಗಿತ್ತು. ಆ ವರ್ಷ ಒಟ್ಟು ನಾಲ್ಕು ಪದಕಗಳು ಭಾರತದ ಪಾಲಾಗಿದ್ದವು. 1984ರಲ್ಲೂ ನಾಲ್ಕು ಪದಕ (ತಲಾ ಎರಡು ಬೆಳ್ಳಿ, ಎರಡು ಕಂಚು) ಗಳಿಸಿ ‘ಶ್ರೇಷ್ಠ’ ಸಾಧನೆ ಮಾಡಿತ್ತು. ಈ ಬಾರಿ ಎಂಟು ಬೆಳ್ಳಿ ಮತ್ತು ಆರು ಕಂಚಿನ ಪದಕಗಳೂ ಭಾರತದ ಕ್ರೀಡಾಪಟುಗಳ ಕೊರಳನ್ನು ಅಲಂಕರಿಸಿದ್ದವು.

ಜೀವನ ‘ಕುಸ್ತಿ’ಯಲ್ಲಿ ಖಳ ಸುಶೀಲ್
ಒಲಿಂಪಿಕ್ಸ್‌ನಲ್ಲಿ ಎರಡು ಪದಕ ಗೆದ್ದ ಕುಸ್ತಿ ಕಣದ ನಾಯಕ ನಿಜಜೀವನದಲ್ಲಿ ‘ಖಳ’ನಾಗಿ ಭಾರತ ಕ್ರೀಡಾಕ್ಷೇತ್ರಕ್ಕೆ ಕೆಟ್ಟ ಹೆಸರು ತಂದರು. ಮಾಜಿ ಜೂನಿಯರ್ ಕುಸ್ತಿ ಚಾಂಪಿಯನ್ ಸಾಗರ್ ಅವರನ್ನು ಮೇ ತಿಂಗಳಲ್ಲಿ ಥಳಿಸಿ ಕೊಂದ ಪ್ರಕರಣದಲ್ಲಿ ಅದೇ ತಿಂಗಳಾಂತ್ಯದಲ್ಲಿ ಸುಶೀಲ್ ಬಂಧನವಾಗಿತ್ತು. ಜೂನ್ ಎರಡರಿಂದ ಸುಶೀಲ್‌ ಜೈಲಿನಲ್ಲಿದ್ದಾರೆ.

ವಿಶ್ವ ಬ್ಯಾಡ್ಮಿಂಟನ್‍ನಲ್ಲಿ ‘ಡಬಲ್’ ಸಾಧನೆ
ವಿಶ್ವ ಬ್ಯಾಡ್ಮಿಂಟನ್‍ ಚಾಂಪಿಯನ್‌ಷಿಪ್‌ನಲ್ಲಿ ಎರಡು ಪದಕಗಳು ಬಂದದ್ದು ವರ್ಷದ ಕೊನೆಯಲ್ಲಿ ಖುಷಿಗೆ ಕಾರಣವಾಯಿತು. ಕಿದಂಬಿ ಶ್ರೀಕಾಂತ್ ಮತ್ತು ಲಕ್ಷ್ಯ ಸೇನ್ ಕ್ರಮವಾಗಿ ಬೆಳ್ಳಿ ಮತ್ತು ಕಂಚಿನ ಪದಕ ಗೆದ್ದುಕೊಂಡರು. ಕೊರೊನಾದಿಂದಾಗಿ ಸಂಕಷ್ಟಕ್ಕೆ ಒಳಗಾಗಿದ್ದ ಬ್ಯಾಡ್ಮಿಂಟನ್ ಕ್ಷೇತ್ರದಲ್ಲಿ ಇದು ಬೆಳಕಿಂಡಿಯಾಗಿ ಮೂಡಿತು.