ಕೊರೊನಾ‌ ಹತೋಟಿಗೆ ಬರದಿದ್ದರೆ ಒಲಿಂಪಿಕ್ಸ್‌ ರದ್ದು: ಯೋಶಿರೊ ಮೊರಿ

ಜಪಾನ್‌ನ ಕ್ರೀಡಾ ಪತ್ರಿಕೆಯೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ ಅವರು ಈ ಕುರಿತು ಮಾತನಾಡಿದ್ದಾರೆ. ಸೋಂಕು ಪ್ರಮಾಣ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿದೆ. 2021ರ ವೇಳೆಗೂ ಇದು ನಿಯಂತ್ರಣಕ್ಕೆ ಬರದೇ ಇರಬಹುದು. ಆಗ ಮುಂದಿನ ನಡೆ ಏನು ಎಂಬ ವೈದ್ಯಕೀಯ ತಜ್ಞರ ಸಂದೇಹಕ್ಕೆ ಅವರು ಈ ಮೇಲಿನಂತೆ ಪ್ರತಿಕ್ರಿಯಿಸಿದ್ದಾರೆ.

ಈ ವರ್ಷ ನಡೆಯಬೇಕಿದ್ದ ಒಲಿಂಪಿಕ್ಸ್‌ ಕೂಟವನ್ನು ಈಗಾಗಲೇ 2021 ಜುಲೈಗೆ ಮುಂದೂಡಲಾಗಿದೆ.

‘ಈ ಹಿಂದೆ ಮೊದಲ ಮಹಾಯುದ್ಧದ ಸಂದರ್ಭದಲ್ಲಿ ಮಾತ್ರ ಒಲಿಂಪಿಕ್ಸ್‌ ಕೂಟ ರದ್ದಾಗಿತ್ತು. ಈಗ ನಾವು ಅಗೋಚರ ಶತ್ರುವಿನ (ಕೊರೊನಾ ವೈರಾಣು) ವಿರುದ್ಧ ಹೋರಾಡುತ್ತಿದ್ದೇವೆ. ವೈರಾಣುವಿನ ಉಪಟಳ ಹೆಚ್ಚಾದರೆ 2022ಕ್ಕೆ ಕೂಟವನ್ನು ಮುಂದೂಡುವುದಿಲ್ಲ; ಬದಲಿಗೆ ರದ್ದುಗೊಳಿಸಲಾಗುತ್ತದೆ. ನಿಯಂತ್ರಣಕ್ಕೆ ಬಂದರೆ 2021ಕ್ಕೇ ಕೂಟ ನಡೆಸುವ ವಿಶ್ವಾಸವಿದೆ’ ಎಂದು ಮೊರಿ ತಿಳಿಸಿದ್ದಾರೆ.

ಆದರೆ ಒಲಿಂಪಿಕ್ಸ್‌ ರದ್ದು ಕುರಿತು ಪ್ರತಿಕ್ರಿಯಿಸಲು ನಿರಾಕರಿಸಿರುವ ಕೂಟದ ವಕ್ತಾರ ಮಸಾ ಟಕಾಯಾ, ‘ಮೊರಿ ಹೇಳಿಕೆ ಅವರ ವೈಯಕ್ತಿಕ ಅಭಿಪ್ರಾಯ’ ಎಂದಿದ್ದಾರೆ.

‘ಕೋವಿಡ್‌–19 ಪಿಡುಗಿಗೆ ಚಿಕಿತ್ಸೆ ಕಂಡುಹಿಡಿಯದಿದ್ದರೆ 2021ಕ್ಕೂ ಒಲಿಂಪಿಕ್ಸ್‌ ಆಯೋಜಿಸುವುದು ತೀರಾ ಕಷ್ಟವಾಗಲಿದೆ’ ಎಂದು ಮಂಗಳವಾರ ಜಪಾನ್‌ನ ವೈದ್ಯಕೀಯ ಅಸೋಸಿಯೇಷನ್‌ನ ಮುಖ್ಯಸ್ಥ ಯೋಶಿಟಾಕೆ ಯೊಕೊಕುರಾ ಎಚ್ಚರಿಕೆ ನೀಡಿದ್ದಾರೆ.

‘ಒಲಿಂಪಿಕ್ಸ್ ಹಾಗೂ ಪ್ಯಾರಾಲಿಂಪಿಕ್ಸ್‌ ಎರಡಕ್ಕೂ ಒಂದೇ ಬಾರಿ ಉದ್ಘಾಟನಾ ಹಾಗೂ ಸಮಾರೋಪ ಸಮಾರಂಭ ಆಯೋಜಿಸಲು ಯೋಚಿಸಬೇಕು. ಇದರಿಂದ ಸಾಕಷ್ಟು ವೆಚ್ಚದ ಹೊರೆ ಕಡಿಮೆಯಾಗಲಿದೆ’ಎಂದು ಸಂದರ್ಶನದಲ್ಲಿ ಮೊರಿ ಹೇಳಿದ್ದಾರೆ.