ಕಿಟಾಕಿಯುಷು, ಜಪಾನ್ (ಎಎಫ್ಪಿ): ಅಮೆರಿಕದ ಜಿಮ್ನಾಸ್ಟಿಕ್ಸ್ ತಾರೆ ಸಿಮೊನ್ ಬೈಲ್ಸ್ ಇದೇ ವಾರ ಇಲ್ಲಿ ನಡೆಯಲಿರುವ ವಿಶ್ವ ಜಿಮ್ನಾಸ್ಟಿಕ್ಸ್ ಚಾಂಪಿಯನ್ಷಿಪ್ನಲ್ಲಿ ಸ್ಪರ್ಧಿಸುತ್ತಿಲ್ಲ. ಅದರಿಂದಾಗಿ ಉದಯೋನ್ಮುಖ ಜಿಮ್ನಾಸ್ಟ್ಗಳಿಗೆ ಮಿಂಚುವ ಅವಕಾಶ ಸಿಗಲಿದೆ.
ಸದ್ಯ ಬೈಲ್ಸ್ ಅವರು ‘ಗೋಲ್ಡ್ ಅಕ್ರಾಸ್ ಅಮೆರಿಕಾ’ ರಾಜಲ್–ಡಾಜಲ್ ಜಿಮ್ನಾಸ್ಟಿಕ್ಸ್ ಸ್ಟೇಜ್ ಷೋಗಳಲ್ಲಿ ನಿರತರಾಗಿದ್ದಾರೆ.
ಒಲಿಂಪಿಕ್ ಆಲ್ರೌಂಡ್ ಚಾಂಪಿಯನ್ ಸುನಿಸಾ ಲೀ ‘ಡಾನ್ಸಿಂಗ್ ವಿಥ್ ದ ಸ್ಟಾರ್ಸ್‘ ಟಿವಿ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದಾರೆ. ಆದ್ದರಿಂದ ಅವರೂ ವಿಶ್ವ ಚಾಂಪಿಯನ್ಷಿಪ್ನಲ್ಲಿ ಸ್ಪರ್ಧಿಸುವುದಿಲ್ಲ.
ಆದರೆ ಈ ಖ್ಯಾತನಾಮರ ಗೈರುಹಾಜರಿಯಿಂದಾಗಿ ಯುವಪ್ರತಿಭೆಗಳಿಗೆ ಅವಕಾಶ ಲಭಿಸಿದೆ. 18 ವರ್ಷದ ಲಿನ್ ವಾಂಗ್, ಅರ್ಹತಾ ಸುತ್ತಿನಲ್ಲಿ ಎರಡನೇ ಸ್ಥಾನ ಪಡೆದಿದ್ದಾರೆ. 17 ವರ್ಷದ ಕೈಲಾ ಡಿಸೆಲೊ ಮೂರನೇ ಸ್ಥಾನ ಪಡೆದರು.
ಬೈಲ್ಸ್ ವಿಶ್ವ ಚಾಂಪಿಯನ್ಷಿಪ್ಗಳಲ್ಲಿ 19 ಚಿನ್ನದ ಪದಕಗಳನ್ನು ಗೆದ್ದಿರುವ ದಾಖಲೆ ಹೊಂದಿದ್ದಾರೆ. ಅವರು ಅಗ್ರಶ್ರೇಯಾಂಕದಲ್ಲಿದ್ದಾರೆ. ಆದರೆ ಈ ಬಾರಿ ಹಿಂದೆ ಸರಿದಿರುವುದರಿಂದ ಅಗ್ರಸ್ಥಾನ ಕಳೆದುಕೊಳ್ಳುವ ಸಾಧ್ಯತೆ ಇದೆ.