ನವದೆಹಲಿ: ಭಾರತ ಮತ್ತು ಪಾಕಿಸ್ತಾನ ನಡುವೆ ಇಸ್ಲಾಮಾಬಾದ್‌ನಲ್ಲಿ ಸೆಪ್ಟೆಂಬರ್‌ 14 ಮತ್ತು 15ರಂದು ನಡೆಯಬೇಕಾಗಿದ್ದ ಡೇವಿಸ್‌ ಕಪ್‌ ಪಂದ್ಯವನ್ನು ನವೆಂಬರ್‌ಗೆ ಮುಂದೂಡಲಾಗಿದೆ. ಅಂತರರಾಷ್ಟ್ರೀಯ ಟೆನಿಸ್‌ ಫೆಡರೇಷನ್‌ (ಐಟಿಎಫ್‌), ಭದ್ರತಾ ವ್ಯವಸ್ಥೆ ಪರಾಮರ್ಶೆ ನಡೆಸಿದ ನಂತರ ಈ ನಿರ್ಧಾರಕ್ಕೆ ಬಂದಿದೆ.
‘ವಿಶೇಷ ಸಂದರ್ಭ’ವೆಂದು ಪರಿಗಣಿಸಿ ಏಷ್ಯಾ–ಒಷಾನಿಯಾ ವಲಯದ ಒಂದನೇ ಗುಂಪಿನ ಈ ಪಂದ್ಯವನ್ನು ಮುಂದೂಡಲಾಗಿದೆ ಎಂದು ಐಟಿಎಫ್‌ ಹೇಳಿಕೆಯೊಂದರಲ್ಲಿ ತಿಳಿಸಿದೆ.ಪಂದ್ಯದ ಪರಿಷ್ಕೃತ ದಿನಾಂಕವನ್ನು ಸೆ.9ಕ್ಕೆ ಮೊದಲು ನಿಗದಿಪಡಿಸಲಾಗುವುದು.
‘ಇದೊಂದು ಅಸಾಧಾರಣ ಸಂದರ್ಭ. ಆಟಗಾರರ, ಅಧಿಕಾರಿಗಳ ಮತ್ತು ಪ್ರೇಕ್ಷಕರ ಸುರಕ್ಷೆ ಐಟಿಎಫ್‌ನ ಮೊದಲ ಆದ್ಯತೆ’ ಎಂದು ಹೇಳಿದೆ.
