ಟೆನಿಸ್ | ತಾಯ್ತನದ ವಿರಾಮದಿಂದ ವಾಪಸ್: ಸೆಮಿಫೈನಲ್ ತಲುಪಿದ ಸಾನಿಯಾ

ಐದನೇ ಶ್ರೇಯಾಂಕದ ಸಾನಿಯಾ–ನಾದಿಯಾ ಜೋಡಿ ಅಮೆರಿಕದ ವಾನಿಯಾ ಕಿಂಗ್ ಮತ್ತು ಕ್ರಿಸ್ಟಿನಾ ಮೆಕಾಲೆ ಅವರನ್ನು 6–2, 4–6, 10–4ರಲ್ಲಿ ಮಣಿಸಿದರು. ಪಂದ್ಯ ಕೇವಲ 24 ನಿಮಿಷಗಳಲ್ಲಿ ಮುಗಿಯಿತು. ಮುಂದಿನ ಪಂದ್ಯದಲ್ಲಿ ಅವರು ಸ್ಲೊವೇನಿಯಾದ ತಮಾರ ಜಿಡಾನ್ಸೆಕ್ ಮತ್ತು ಜೆಕ್ ಗಣರಾಜ್ಯದ ಮರೀ ಬುಸ್ಕೋವ ವಿರುದ್ಧ ಆಡಲಿದ್ದಾರೆ.

ತಮಾರ–ಬುಸ್ಕೋವ ಜೋಡಿ ಕ್ವಾರ್ಟರ್ ಫೈನಲ್‌ನಲ್ಲಿ ಕೆನಡಾದ ಶರೋನ್ ಫಿಚ್‌ಮ್ಯಾನ್ ಮತ್ತು ಉಕ್ರೇನ್‌ನ ಕ್ಯಾತೆರಿನಾ ಬೊಂಡೊರೆಂಕೊ ಅವರನ್ನು 6–3, 3–6, 10–4ರಲ್ಲಿ ಮಣಿಸಿತು.

ಗುರುವಾರದ ಪಂದ್ಯದ ಆರಂಭದಲ್ಲೇ ಆಕ್ರಮಣಕಾರಿ ಆಟವಾಡಿದ ಸಾನಿಯಾ ಮತ್ತು ನಾದಿಯಾ ಎರಡು ಬಾರಿ ಎದುರಾಳಿಗಳ ಸರ್ವ್‌ ಮುರಿದು ಮುನ್ನಡೆ ಸಾಧಿಸಿದರು. ಮೊದಲ ಸೆಟ್‌ನಲ್ಲಿ ನಾಲ್ಕು ಬ್ರೇಕ್ ಪಾಯಿಂಟ್‌ಗಳನ್ನೂ ಗೆದ್ದು ಗಮನ ಸೆಳೆದರು.

ಎರಡನೇ ಸೆಟ್‌ನಲ್ಲಿ ತಿರುಗೇಟು ನೀಡಿದ ಎದುರಾಳಿಗಳು ಪಂದ್ಯದಲ್ಲಿ ಸಮಬಲ ಸಾಧಿಸುವಲ್ಲಿ ಯಶಸ್ವಿಯಾದರು. ಮೂರನೇ ಸೆಟ್‌ ಮತ್ತೆ ಸಾನಿಯಾ–ನಾದಿಯಾ ಪಾರಮ್ಯಕ್ಕೆ ಸಾಕ್ಷಿಯಾಯಿತು. ಅಮೋಘ ಸರ್ವ್‌ಗಳ ಮೂಲಕ ಈ ಜೋಡಿ ವಾನಿಯಾ–ಕ್ರಿಸ್ಟಿನಾ ಅವರನ್ನು ಕಂಗೆಡಿಸಿದರು.

33 ವರ್ಷದ ಸಾನಿಯಾ ಎರಡು ವರ್ಷಗಳ ನಂತರ ಡಬ್ಲ್ಯುಟಿಎ ಟೂರ್ನಿಯೊಂದರಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ. ಪಾಕಿಸ್ತಾನದ ಕ್ರಿಕೆಟಿಗ ಶೋಯೆಬ್ ಅಕ್ತರ್ ಅವರನ್ನು ವಿವಾಹವಾಗಿರುವ ಸಾನಿಯಾ ಗರ್ಭಿಣಿಯಾದ ನಂತರ 2018ರಲ್ಲಿ ಟೆನಿಸ್ ಅಂಗಣದಿಂದ ದೂರ ಉಳಿದಿದ್ದರು.