ಬೆಂಗಳೂರು: ವಂಶವಾಹಿನಿಯಲ್ಲಿ ದೋಷ ಹೊಂದಿದ್ದ ದಂಪತಿಗೆ ಆರೋಗ್ಯವಂತ ಮಗು ಜನಿಸುವಂತೆ ಮಾಡುವಲ್ಲಿ ನಗರದ ಗುಣಶೀಲ ಸರ್ಜಿಕಲ್ ಆ್ಯಂಡ್ ಮೆಟರ್ನಿಟಿ ಆಸ್ಪತ್ರೆಯು ಯಶಸ್ವಿಯಾಗಿದೆ.
ಸಿಕಲ್ ಸೆಲ್ ಕಾಯಿಲೆ ಹೊಂದಿದ್ದ ಈ ದಂಪತಿಯ ಎಚ್ಬಿಬಿ ವಂಶವಾಹಿನಿಯನ್ನು ಬದಲಿಸದೆ ಇವರ ಹೆಣ್ಣುಮಗುವಿಗೆ ಈ ಕಾಯಿಲೆ ವರ್ಗಾವಣೆಯಾಗದಂತೆ ನೋಡಿಕೊಳ್ಳಲಾಗಿದೆ.
ಡಾ. ವಾಣಿಶ್ರೀ (35 ವರ್ಷ) ಅವರು ಅಲೋಕ್ ಕಾಳೆಯವರನ್ನು ವಿವಾಹವಾಗಿ ಪ್ರಸ್ತುತ ಮೈಸೂರಿನಲ್ಲಿ ನೆಲೆಸಿದ್ದಾರೆ. ಇಬ್ಬರೂ ತಮ್ಮ ವಂಶವಾಹಿನಿಯಲ್ಲಿ ಸಿಕಲ್ ಸೆಲ್ ವಂಶವಾಹಿನಿಯ ಸಮಸ್ಯೆ ಹೊಂದಿರುವುದರಿಂದ ಅವರಿಗೆ ಮಗು ಪಡೆಯುವುದು ಸಾಧ್ಯವಾಗಿರಲಿಲ್ಲ. ತಮ್ಮ ಮಗು ಕೂಡ ಸಿಕಲ್ ಸೆಲ್ ರೋಗದೊಂದಿಗೆ ಜನಿಸುತ್ತದೆ ಎಂದು ಅವರು ಆತಂಕಗೊಂಡಿದ್ದರು.
ಸಿಕಲ್ ಸೆಲ್ ಕಾಯಿಲೆ ರಕ್ತಕ್ಕೆ ಸಂಬಂಧಿಸಿದ ಅನಾರೋಗ್ಯದ ಸಮಸ್ಯೆ. ಮನುಷ್ಯನ ದೇಹದಲ್ಲಿ ಬೀಟಾ-ಗ್ಲೋಬಿನ್ ಸರಣಿಯಲ್ಲಿರುವ ಏಕ ವರ್ಣತಂತುವಿನ ಸಮಸ್ಯೆಯಿಂದ ಉಂಟಾಗುತ್ತದೆ. ಮಗು ತನ್ನ ತಂದೆ, ತಾಯಿಯಿಂದ ತಲಾ ಒಂದೊಂದು ಅನಾರೋಗ್ಯಪೀಡಿತ ವರ್ಣತಂತು ಪಡೆದುಕೊಂಡಿದ್ದರೆ ಈ ಕಾಯಿಲೆಯೊಂದಿಗೆ ಜನಿಸುತ್ತದೆ.