ಸುಶಾಂತ್‌ ಸಿಂಗ್‌ ಆತ್ಮಹತ್ಯೆ: ಸ್ನೇಹಿತ ಸಿದ್ಧಾರ್ಥ್‌ ಪಿಥಾಣಿ ಹೇಳಿಕೆ ದಾಖಲು

ಮುಂಬೈ: ಬಾಲಿವುಡ್‌ ನಟ ಸುಶಾಂತ್‌ ಸಿಂಗ್‌ ರಜಪೂತ್‌ ಆತ್ಮಹತ್ಯೆ ಪ್ರಕರಣ ಸಂಬಂಧ ಬಿಹಾರ ಪೊಲೀಸರು ಸೋಮವಾರ ಸಂಜೆ ಸುಶಾಂತ್‌ ಗೆಳೆಯ ಸಿದ್ಧಾರ್ಥ ಪಿಥಾನಿ ಅವರ ಹೇಳಿಕೆಯನ್ನು ದಾಖಲಿಸಿಕೊಂಡಿದ್ದಾರೆ.

ಪಿಥಾಣಿ, ಒಂದು ವರ್ಷದಿಂದ ಸುಶಾಂತ್‌ ಜೊತೆ ವಾಸವಿದ್ದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಪ್ರಕರಣ ಸಂಬಂಧ ಬಿಹಾರ ಪೊಲೀಸರ ತಂಡ ಸುಶಾಂತ್‌ ಸಿಂಗ್‌ ಮ್ಯಾನೇಜರ್‌ ದಿಪೇಶ್‌ ಸಾವಂತ್‌, ಸುಶಾಂತ್ ಕುಟುಂಬದವರು, ಮಾಜಿ ಪ್ರೇಯಸಿ ಸೇರಿದಂತೆ ಈವರೆಗೆ ಒಟ್ಟು 10 ಮಂದಿಯ ಹೇಳಿಕೆ ದಾಖಲಿಸಿಕೊಂಡಿದೆ.

ಆತ್ಮಹತ್ಯೆಗೆ ಪ್ರಚೋದನೆ ನೀಡಿದ್ದಾರೆ ಎಂದು ಆರೋಪಿಸಿ ಸುಶಾಂತ್‌ ತಂದೆ ಕೆ.ಕೆ.ಸಿಂಗ್‌, ಬಾಲಿವುಡ್‌ ನಟಿ ರಿಯಾ ಚಕ್ರವರ್ತಿ ಮತ್ತು ಅವರ ಕುಟುಂಬದ ಸ‌ದಸ್ಯರ ವಿರುದ್ಧ ದೂರು ದಾಖಲಿಸಿದ್ದರು. ಈ ಸಂಬಂಧ ಬಿಹಾರ ಪೊಲೀಸರ ತಂಡವು ಮುಂಬೈನಲ್ಲಿ ತನಿಖೆ ಕೈಗೊಂಡಿದೆ.