ಹಾಂಗ್ಕಾಂಗ್ : ಶಂಕಿತ ಅಪರಾಧಿಗಳನ್ನು ವಿಚಾರಣೆಗಾಗಿ ಚೀನಾಕ್ಕೆ ಕಳಿಸಲು ಅನುವು ಮಾಡಿಕೊಡಲು ಕಾನೂನು ತಿದ್ದುಪಡಿಯನ್ನು ವಿರೋಧಿಸಿ ಹಾಂಗ್ ಕಾಂಗ್ನಲ್ಲಿ ಭುಗಿಲೆದ್ದಿರುವ ಪ್ರತಿಭಟನೆ ಶನಿವಾರ ಮತ್ತಷ್ಟು ತೀವ್ರಗೊಂಡಿತು.
ಹಾಂಗ್ಕಾಂಗ್ನ ಗಡಿ ಪ್ರದೇಶದಲ್ಲಿರುವ ಯುಯೆನ್ ಲಾಂಗ್ ಪಟ್ಟಣದಲ್ಲಿ ಶನಿವಾರ ಪ್ರತಿಭಟನೆ ನಿರತರ ಮೇಲೆ ಪೊಲೀಸರು ಅಶ್ರುವಾಯು ಸಿಡಿಸಿ, ಪ್ರತಿಭಟನೆ ಹತ್ತಿಕ್ಕಲು ಪ್ರಯತ್ನಿಸಿದರು.
ಈ ಸಂದರ್ಭದಲ್ಲಿ ಪೊಲೀಸರು ಮತ್ತು ಪ್ರತಿಭಟನಕಾರರ ನಡುವೆ ಘರ್ಷಣೆ ಪರಿಣಾಮ, ಕೆಲ ಪ್ರತಿಭಟನಕಾರರು ಪೊಲೀಸರತ್ತ ಸ್ಫೋಟಕಗಳನ್ನು ಎಸೆದ ಘಟನೆಯೂ ನಡೆಯಿತು. ಈ ಘಟನೆಯಲ್ಲಿ 45 ಮಂದಿ ಗಂಭೀರವಾಗಿ ಗಾಯಗೊಂಡಿದ್ದಾರೆ.
ಶನಿವಾರ ಪ್ರತಿಭಟನಾ ರ್ಯಾಲಿ ಶಾಂತಿಯುತವಾಗಿಯೇ ಆರಂಭವಾಗಿತ್ತು. ಆದರೆ, ಪೊಲೀಸರು ಮಧ್ಯಪ್ರವೇಶಿಸಿದಾಗ ಪ್ರತಿಭಟನಕಾರರ ಗುಂಪು ತಿರುಗಿಬಿದ್ದಿತು. ಮುಖಕವಚ, ಹೆಲ್ಮೆಟ್ ತೊಟ್ಟಿದ್ದ ಪ್ರತಿಭಟನಕಾರರು, ಅಶ್ರುವಾಯುಗೆ ಪ್ರತಿರೋಧವಾಗಿ ದೊಡ್ಡ ಕೊಡೆಗಳ ಮೊರೆ ಹೋದರು.