ವಾಷಿಂಗ್ಟನ್‌: ಮಂಗಳನ ಅಂಗಳಕ್ಕೆ ಹಾರಲಿರುವ ನಾಸಾದ ಮೊದಲ ಹೆಲಿಕಾಪ್ಟರ್‌ಗೆ ಹೆಸರು ನೀಡಿದ ಹೆಗ್ಗಳಿಕೆ ಭಾರತ ಮೂಲದ ಬಾಲಕಿಗೆ ದೊರಕಿದೆ.
ಅಲಬಾಮಾದ ನಾರ್ತ್‌ಪೋರ್ಟ್‌ನ ಪ್ರೌಢಶಾಲೆಯ ವಿದ್ಯಾರ್ಥಿನಿ ವನೀಜಾ ರೂಪಾನಿ ಈ ಜಾಣ್ಮೆ ತೋರಿದವರು. ರೂಪಾನಿ, ನಾಸಾದ ‘ನೇಮ್ ದಿ ರೋವರ್’ ಸ್ಪರ್ಧೆಯಲ್ಲಿ ಪ್ರಬಂಧವನ್ನು ಮಂಡಿಸಿದ್ದರು. ಇದೀಗ ಅವರು ಸೂಚಿಸಿದ್ದ ಹೆಸರನ್ನೇ ನಾಸಾ ಇಟ್ಟಿದೆ.
ಅನ್ಯ ಗ್ರಹದಲ್ಲಿ ಹಾರಾಟವನ್ನು ನಡೆಸಲಿರುವ ಮೊದಲ ಹೆಲಿಕಾಪ್ಟರ್ ಎಂಬ ಹೆಗ್ಗಳಿಕೆಗೆ ಇದು ಪಾತ್ರವಾಗಲಿದೆ.
‘ನಮ್ಮ ಮಾರ್ಸ್ ಹೆಲಿಕಾಪ್ಟರ್‌ಗೆ ಹೊಸ ಹೆಸರು ದೊರಕಿದೆ! ‘ಇಂಜಿನ್ಯೂಯಿಟಿ’ಯನ್ನು ಭೇಟಿಯಾಗಿ. ವಿದ್ಯಾರ್ಥಿನಿ ವನೀಜಾ ರೂಪಾನಿ ನಮ್ಮ ‘ನೇಮ್ ದಿ ರೋವರ್ ಸ್ಪರ್ಧೆಯಲ್ಲಿ ಗೆಲುವು ಸಾಧಿಸಿದ್ದಾರೆ’ ಎಂದು ನಾಸಾ ಟ್ವೀಟ್ ಮಾಡಿದೆ.
ಈ ಸ್ಪರ್ಧೆಯಲ್ಲಿ ಅಮೆರಿಕದ ಪ್ರತಿ ರಾಜ್ಯದ ವಿದ್ಯಾರ್ಥಿಗಳಿಂದ 28,000 ಪ್ರಬಂಧ ಸಲ್ಲಿಕೆಯಾಗಿತ್ತು.
