ಕೋವಿಡ್–19 | ರೆಮೆಡ್‌ ಸಿವಿರ್ ಔಷಧಿ ಬಳಕೆ ಜಪಾನ್ ಒಪ್ಪಿಗೆ

ಟೊಕಿಯೊ: ಕೋವಿಡ್‌ ಪೀಡಿತ ರೋಗಿಗಳಿಗೆ ಆ್ಯಂಟಿ ವೈರಲ್ ಔಷಧಿಯಾಗಿ ರೆಮೆಡ್‌ಸಿವಿರ್ ಅನ್ನು ನೀಡಲು ಜಪಾನ್ ಸರ್ಕಾರ ಗುರುವಾರ ಒಪ್ಪಿಗೆ ನೀಡಿದೆ. 

ಕೋವಿಡ್‌–19ನಿಂದ ತೀವ್ರತರವಾಗಿ ಬಳಲುತ್ತಿರುವವರ ತುರ್ತುಬಳಕೆಗಾಗಿ ರೆಮೆಡ್‌ಸಿವಿರ್ ಅನ್ನು ಬಳಸಲು ಅಮೆರಿಕ ಮೊದಲು ಅನುಮತಿ ನೀಡಿತ್ತು. ಇದೀಗ ಈ ಔಷಧಿ ಬಳಸಲು ಅನುಮತಿ ನೀಡಿದ ಎರಡನೇ ರಾಷ್ಟ್ರವಾಗಿದೆ. 

‘ಕೆಲ ಅಪವಾದಗಳ ಹೊರತಾಗಿ ರೆಮೆಡ್‌ಸಿವಿರ್ ಅನ್ನು ಬಳಸಲು ಅನುಮೋದಿಸಲಾಗಿದೆ’ ಎಂದು ಜಪಾನ್ ಆರೋಗ್ಯ, ಕಾರ್ಮಿಕ ಮತ್ತು ಕಲ್ಯಾಣ ಸಚಿವಾಲಯದ ಅಧಿಕಾರಿಯೊಬ್ಬರು ಹೇಳಿದ್ದಾರೆ. 

ಅಮೆರಿಕದ ಗಿಲ್ಯಾಡ್ ಸೈನ್ಸಸ್ ಸಂಸ್ಥೆ ಅಭಿವೃದ್ಧಿ ಪಡಿಸಿರುವ ಈ ಪ್ರಾಯೋಗಿಕ ಔಷಧಿ ಬಳಕೆಗೆ ಶೀಘ್ರವೇ ಸರ್ಕಾರ ಹಸಿರು ನಿಶಾನೆ ನೀಡಲಿದೆ ಎಂದು ಜಪಾನ್ ಪ್ರಧಾನಿ ಶಿಂಜೊ ಅಬೆ ಕಳೆದ ವಾರ ಹೇಳಿದ್ದರು.