ಶನಿವಾರ, ಮೇ 30, 2020
27 °C

ಬ್ರಿಟನ್‌ | ಕೊರೊನಾ ವೈರಸ್‌ ಪತ್ತೆಗಾಗಿ ಶ್ವಾನಗಳಿಗೆ ತರಬೇತಿ, ಹೊಸ ಪ್ರಯೋಗ

ಪಿಟಿಐ Updated:

ಅಕ್ಷರ ಗಾತ್ರ : | |

ಲಂಡನ್‌: ವಾಸನೆಯಿಂದಲೇ ಅಪರಾಧಿಗಳನ್ನು ಕಂಡುಹಿಡಿಯುತ್ತಿದ್ದ ಶ್ವಾನಗಳನ್ನು ವ್ಯಕ್ತಿಯಲ್ಲಿ ಕೊರೊನಾ ವೈರಸ್ ಸೋಂಕಿರುವುದನ್ನು ಪತ್ತೆ ಹಚ್ಚಲು ಬಳಸಿಕೊಳ್ಳುವ ಪ್ರಯೋಗಕ್ಕೆ ಬ್ರಿಟನ್‌‌ ಸರ್ಕಾರ ಶನಿವಾರ ಚಾಲನೆ ನೀಡಿದೆ. 

ವಿಶೇಷ ತರಬೇತಿ ಪಡೆಯಲಿರುವ ಈ ‘ ಕೋವಿಡ್‌–ಶ್ವಾನಗಳು’ ಮುಂದಿನ ದಿನಗಳಲ್ಲಿ ವಾಸನೆಯ ಮೂಲಕವೇ ಕೊರೊನಾ ವೈರಸ್‌ ಪತ್ತೆ ಹಚ್ಚಲು ಶಕ್ತವಾಗಬಹುದೇ ಎಂಬುದರ ಬಗ್ಗೆ ಪ್ರಯೋಗ ನಡೆಸಲಾಗುತ್ತದೆ. 

ವಾಸನೆಯಿಂದಲೇ ಕ್ಯಾನ್ಸರ್‌, ಮಲೇರಿಯಾ ಮತ್ತು ಪಾರ್ಕಿನ್‌ಸನ್‌ನಂಥ ಕಾಯಿಲೆಗಳನ್ನು ಶ್ವಾನಗಳು ಪತ್ತೆ ಹಚ್ಚುವಲ್ಲಿ ಯಶಸ್ವಿಯಾಗಿವೆ. 

‘ಶ್ವಾನಗಳು ಕೆಲವು ನಿರ್ದಿಷ್ಟ ಕ್ಯಾನ್ಸರ್‌ಗಳನ್ನು ಪತ್ತೆ ಹಚ್ಚುತ್ತವೆ ಎಂಬುದು ಈಗಾಗಲೇ ಸಾಬೀತಾಗಿದೆ. ಹಾಗೆಯೇ ಕೋವಿಡ್‌ ಶ್ವಾನಗಳು ಕೊರೊನಾ ವೈರಸ್‌ ಅನ್ನು ಪತ್ತೆ ಹಚ್ಚಿ, ಅದನ್ನು ಹರಡದಂತೆ ಮಾಡಲು ಶಕ್ತವಿರುವ ಬಗ್ಗೆ ಈ ಪ್ರಯೋಗ ನಿಖರವಾಗಿ ಹೇಳಬಲ್ಲದು’ ಎಂದು ಆವಿಷ್ಕಾರ ಸಚಿವ ಲಾರ್ಡ್‌ ಬೆಥೆಲ್‌ ಹೇಳಿದ್ದಾರೆ. 

ರೋಗಲಕ್ಷಣ ಇಲ್ಲದೇ ಇದ್ದರೂ ವೈರಸ್‌ ಪತ್ತೆ ಮಾಡಬಲ್ಲವೇ ಎಂದು ಲ್ಯಾಬ್ರಡಾರ್‌ ಮತ್ತು ಕಾಕರ್‌ ಸ್ಪೇನಿಯಲ್‌ಗಳ ಮಿಶ್ರತಳಿಗಳನ್ನು ಈ ಪ್ರಯೋಗಕ್ಕೆ ಒಳಪಡಿಸಲಾಗುತ್ತದೆ. ಕೊರೊನಾ ಸೋಂಕಿತರು ಮತ್ತು ಸೋಂಕಿತರಲ್ಲದವರಿಂದ ವಾಸನೆಯ ಮಾದರಿಗಳನ್ನು ಸಂಗ್ರಹಿಸಿ, ವೈರಸ್‌ ಪತ್ತೆ ಹಚ್ಚಲು ಶ್ವಾನಗಳಿಗೆ ತರಬೇತಿ ನೀಡಲಾಗುತ್ತದೆ’ ಎಂದು ಹೇಳಿದ್ದಾರೆ. 

ಈ ಪ್ರಯೋಗವು ಯಶಸ್ವಿಯಾದರೆ, ಕ್ಷಿಪ್ರಗತಿಯಲ್ಲಿ ಕೊರೊನಾ ಸೋಂಕಿತರನ್ನು ಪತ್ತೆ ಹಚ್ಚಲು ಶ್ವಾನಗಳು ನೆರವಾಗಬಹುದು. 

ಲಂಡನ್‌ ಸ್ಕೂಲ್‌ ಆಫ್‌ ಹೈಜಿನ್‌ ಮತ್ತು ಟ್ರೋಪಿಕಲ್‌ ಮೆಡಿಸಿನ್‌ ಸಂಸ್ಥೆ ಸಂಶೋಧಕರು ಮೊದಲ ಹಂತದ ಈ ಪ್ರಯೋಗವನ್ನು ‘ಮೆಡಿಕಲ್‌ ಡಿಟೆಕ್ಷನ್‌ ಡಾಗ್ಸ್‌’ ಮತ್ತು ಡರ್ಹಾಮ್‌ ವಿಶ್ವವಿದ್ಯಾಲಯದ ಸಹಯೋಗದೊಂದಿಗೆ ನಡೆಸಲಿದ್ದಾರೆ. 

ಇದನ್ನೂ ಓದಿ... ಕೋವಿಡ್‌ ಪತ್ತೆಗಾಗಿ ಶ್ವಾನಗಳಿಗೆ ತರಬೇತಿ ನೀಡಲು ಮುಂದಾದ ಅಮೆರಿಕದ ವಿಜ್ಞಾನಿಗಳು!

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು