ಭಾವಚಿತ್ರವುಳ್ಳ ಮತ ಚೀಟಿ ಬೇಡ: ಆಯೋಗ

ಮುಂಬರುವ ಲೋಕಸಭೆ ಚುನಾವಣೆಯಲ್ಲೇ ಈ ಪದ್ಧತಿಯನ್ನು ಕೈಬಿಡಲಾಗುವುದು. ಜತೆಗೆ, ಉಪಚುನಾವಣೆ ಹಾಗೂ ವಿಧಾನಸಭೆ ಚುನಾವಣೆಗಳಲ್ಲೂ ಈ ಚೀಟಿ ಅನ್ವಯವಾಗುವುದಿಲ್ಲ ಎಂದು ತಿಳಿಸಿದೆ.

ಮತದಾರರ ಪಟ್ಟಿ ಅಂತಿಮಗೊಳಿಸಿದ ನಂತರ ಈ ಚೀಟಿಗಳನ್ನು ಮುದ್ರಿಸಲಾಗುತ್ತಿದೆ ಮತ್ತು ಮತಗಟ್ಟೆ ಬಳಿಯೇ ವಿತರಿಸುತ್ತಿರುವುದರಿಂದ ದುರುಪಯೋಗವಾಗುವ ಸಾಧ್ಯತೆಗಳಿವೆ. ಹೀಗಾಗಿ, ಈ ಕ್ರಮಕೈಗೊಳ್ಳಲಾಗಿದೆ ಎಂದು ಆಯೋಗ ಅಭಿಪ್ರಾಯಪಟ್ಟಿದೆ. ಮತ ಚಲಾಯಿಸಲು ಮತಗಟ್ಟೆಯಲ್ಲಿ ಚುನಾವಣಾ ಆಯೋಗ ನೀಡಿರುವ ಭಾವಚಿತ್ರವುಳ್ಳ ಗುರುತಿನ ಚೀಟಿಯನ್ನು ಮತದಾರರು ಹಾಜರುಪಡಿಸಬೇಕು ಎಂದು ಆಯೋಗ ರಾಜ್ಯಗಳ ಮುಖ್ಯ ಚುನಾವಣಾಧಿಕಾರಿಗಳಿಗೆ ಸೂಚಿಸಿದ್ದಾರೆ.

ಭಾವಚಿತ್ರವುಳ್ಳ ಮತ ಚೀಟಿಯಲ್ಲಿ ಯಾವುದೇ ರೀತಿ ದೃಢೀಕರಣ ಅಥವಾ ಭದ್ರತಾ ವಿನ್ಯಾಸಗಳಿಲ್ಲ. ಈಗಾಗಲೇ ಶೇಕಡ 99ರಷ್ಟು ಮತದಾರರಿಗೆ ಭಾವಚಿತ್ರವುಳ್ಳ ಗುರುತಿನ ಚೀಟಿ ನೀಡಲಾಗಿದೆ. ಜತೆಗೆ ಆಧಾರ್‌ ಕಾರ್ಡ್‌ಗಳನ್ನು ಸಹ ನಾಗರಿಕರಿಗೆ ವಿತರಿಸಲಾಗಿದೆ. ಹೀಗಾಗಿ, ಭಾವಚಿತ್ರವುಳ್ಳ ಮತ ಚೀಟಿಯ ಅಗತ್ಯವಿಲ್ಲ ಎಂದು ತಿಳಿಸಿದೆ.