ನವದೆಹಲಿ: ಜಮ್ಮು ಮತ್ತು ಕಾಶ್ಮೀರದಲ್ಲಿ ‘ಮೋಸ್ಟ್ ವಾಂಟೆಡ್‌ 10 ಉಗ್ರರ ಪಟ್ಟಿ’ಯನ್ನು ಭದ್ರತಾ ಪಡೆಗಳು ಸಿದ್ಧಪಡಿಸಿವೆ.
ಇವರಲ್ಲಿ ಹಿಜ್ಬುಲ್ ಮುಜಾಹಿದ್ದಿನ್‌ನ ಹಿರಿಯ ಕಮಾಂಡರ್ ರಿಯಾಜ್‌ ಅಹಮದ್ ನೈಕೊ ಸಹ ಸೇರಿದ್ದಾನೆ. ಈತನ ಸೆರೆ ಹಿಡಿಯಲು ಇಲ್ಲವೇ ಹತ್ಯೆ ಮಾಡಲು ಕಾರ್ಯಾಚರಣೆ ಆರಂಭಿಸಲಾಗುವುದು ಎಂದು ಅಧಿಕಾರಿಗಳು ಮಂಗಳವಾರ ತಿಳಿಸಿದ್ದಾರೆ.
ಬೇಹುಗಾರಿಕಾ ಏಜೆನ್ಸಿಗಳು, ಅರೆಸೇನಾ ಪಡೆಗಳು, ಸೇನೆ ಮತ್ತು ಜಮ್ಮು ಮತ್ತು ಕಾಶ್ಮೀರ ಪೊಲೀಸರ ಮಾಹಿತಿ ಆಧರಿಸಿ ಈ ಪಟ್ಟಿ ಬಿಡುಗಡೆ ಮಾಡಲಾಗಿದೆ.
ಸರಣಿ ವಿದ್ವಂಸಕ ಕೃತ್ಯ ನಡೆಸಿರುವ ನೈಕೊ, ಭದ್ರತಾ ಪಡೆಗಳು ಮತ್ತು ನಾಗರಿಕರ ಸಾವಿಗೆ ಕಾರಣವಾಗಿದ್ದಾನೆ. ಆದ್ದರಿಂದ ಈತ ಪಟ್ಟಿಯಲ್ಲಿ ಮೊದಲ ಸ್ಥಾನ ಪಡೆದಿದ್ದಾನೆ.
ಕಾಶ್ಮೀರದಲ್ಲಿ ನಡೆದ ಹಲವು ದಾಳಿಗಳಲ್ಲಿ ಭಾಗಿಯಾದ ಇತರ ಉಗ್ರರ ಹೆಸರು ಪಟ್ಟಿಯಲ್ಲಿದೆ.
