ನೈತಿಕತೆ ಪ್ರಶ್ನಿಸುವ ನೈತಿಕತೆ ಯಾರಿಗಿದೆ?: ಸಚಿವ ಸಿ.ಟಿ.ರವಿ ವಾಗ್ದಾಳಿ

ನಗರದಲ್ಲಿ ಶುಕ್ರವಾರ ಉಪ ಚುನಾವಣೆ ಪೂರ್ವಭಾವಿ ಸಭೆಯಲ್ಲಿ ಮಾತನಾಡಿದ ಅವರು, ‘ಕೃಷ್ಣ ಬೈರೇಗೌಡ, ಸಿದ್ದರಾಮಯ್ಯ ಅವರು ಹಿಂದೆ ಯಾವ ಪಕ್ಷದಲ್ಲಿದ್ದರು, ಈಗ ಯಾವ ಪಕ್ಷದಲ್ಲಿದ್ದಾರೆ? ಜಮೀರ್ ಅಹಮ್ಮದ್ ಖಾನ್, ಚೆಲುವರಾಯಸ್ವಾಮಿ, ಬಾಲಕೃಷ್ಣ, ರಮೇಶ್ ಬಂಡಿಸಿದ್ದೇಗೌಡ, ಅಖಂಡ ಶ್ರೀನಿವಾಸಮೂರ್ತಿ ಇವರೆಲ್ಲ ಯಾವ ಪಕ್ಷದಲ್ಲಿ ಇದ್ದರು? ಅವರನ್ನೆಲ್ಲ ಯಾರು ಕಾಂಗ್ರೆಸ್‌ಗೆ ಸೇರಿಸಿಕೊಂಡರು?’ ಎಂದು ವಿರೋಧಿಗಳಿಗೆ ತಿರುಗೇಟು ನೀಡಿದರು.

‘ಮಹಾಭಾರತ ಯುದ್ಧದಲ್ಲಿ ಸೋಲಿನ ಸುಳಿಗೆ ಸಿಲುಕುವವರೆಗೂ ಕೌರವವರಿಗೆ ನೈತಿಕತೆ ನೆನಪಾಗಿರಲಿಲ್ಲ. ಅದೇ ರೀತಿ ಜೆಡಿಎಸ್‌, ಕಾಂಗ್ರೆಸ್‌ನವರು ಸೋಲಿನ ಸುಳಿಯಲ್ಲಿ ಸಿಲುಕಿ ಈಗ ನೈತಿಕತೆಯ ಬಗ್ಗೆ ಮಾತನಾಡುತ್ತಿದ್ದಾರೆ. ನಾನು ಸಮಾಜವಾದಿ ಹಿನ್ನೆಲೆಯಿಂದ ಬಂದವನು ಎಂದು ಹೇಳುವವರಿಗೆ ಸೆಗಣಿ ವಾಸನೆ ಆಗುವುದಿಲ್ಲ. ಸೆಂಟ್‌ ಕೂಡ ಫಾರಿನ್‌ನಿಂದ ಬರಬೇಕು’ ಎಂದು ಲೇವಡಿ ಮಾಡಿದರು.

‘ಅರ್ಕಾವತಿ ಡಿ ನೋಟಿಫಿಕೇಷನ್ ಮಾಡುವುದು ಪ್ರಾಮಾಣಿಕ ರಾಜಕಾರಣಿ ಮಾಡುವ ಕೆಲಸವೆ? ತುರ್ತು ಪರಿಸ್ಥಿತಿ ಹೇರಿ, ಪ್ರಜಾಪ್ರಭುತ್ವ ಬದಿಗೊತ್ತಿ, ಹಕ್ಕುಗಳನ್ನು ಕಿತ್ತುಕೊಂಡವರು ಇವತ್ತು ಸಂವಿಧಾನದ ಬಗ್ಗೆ ಮಾತನಾಡುತ್ತಾರೆ. ಭ್ರಷ್ಟಾಚಾರ ಹೊದ್ದು ಮಲಗಿದ್ದವರು ಪ್ರಾಮಾಣಿಕತೆಯ ಪಾಠ ಹೇಳುತ್ತಿದ್ದಾರೆ’ ಎಂದು ಹೇಳಿದರು.

‘ಸಮಾಜವಾದಿಗಳು ಎಂದು ಹಣೆಪಟ್ಟಿ ಅಂಟಿಸಿಕೊಂಡರವರಲ್ಲಿ ಶಾಂತವೇರಿ ಗೋಪಾಲಗೌಡರು, ರಾಮಮನೋಹರ್ ಲೋಹಿಯಾ ಅವರ ಕಾಲಘಟ್ಟದವರು ಆ ತತ್ವಕ್ಕೆ ತಕ್ಕಂತೆ ಬದುಕಿದವರು. ಅವರ ನಂತರದಲ್ಲಿ ಜಾರ್ಜ್ ಫರ್ನಾಂಡಿಸ್‌ ಅವರಂತಹವರನ್ನು ಹೊರತುಪಡಿಸಿದರೆ ಉಳಿದವರೆಲ್ಲ ಮಜಾವಾದಿಗಳು, ಕುಟುಂಬ ವ್ಯಾಮೋಹಿಗಳಾದರು’ ಎಂದು ಟೀಕಿಸಿದರು.

‘ಸಮಾಜವಾದಿಗಳು ಎಂದು ಹೇಳಿಕೊಂಡ ಮುಲಾಯಂ ಸಿಂಗ್ ಯಾದವ್, ಲಾಲು ಪ್ರಸಾದ್ ಯಾದವ್ ಅವರು ಭ್ರಷ್ಟರು, ಕುಟುಂಬ ವ್ಯಾಮೋಹಿಗಳಾದರು. ರಾಜ್ಯದಲ್ಲಿಯೂ ತುಂಬಾ ಜನ ಇದ್ದಾರೆ. ಹೆಸರು ಹೇಳಿದರೆ ಅವರ ವಾರಸುದಾರರಿಗೆ ಬೇಸರವಾಗುತ್ತದೆ. ಹ್ಯೂಬ್ಲೆಟ್ ವಾಚ್‌, ದುಬಾರಿ ಕನ್ನಡಕ, ಸಿದ್ದರಾಮಯ್ಯ ಅವರ ವೈಯಕ್ತಿಕ ವಿಷಯವನ್ನು ನಾನು ಮಾತನಾಡುವುದಿಲ್ಲ’ ಎಂದು ತಿಳಿಸಿದರು.

‘ರಾಹು, ಕೇತುಗಳಂತೆ 14 ತಿಂಗಳು ಕಾಲ ರಾಜ್ಯಕ್ಕೆ ಹಿಡಿದ ಗ್ರಹಣ ಈಗ ಬಿಟ್ಟಿದೆ. ಗುರು ಬಲ, ಶುಕ್ರದೆಸೆ ಎರಡೂ ಈಗ ಬಿಜೆಪಿ ಜತೆಗಿವೆ. ಆದ್ದರಿಂದ ಯಾರು ಏನೂ ಮಾಡಿಕೊಳ್ಳಲು ಆಗುವುದಿಲ್ಲ. ಕುಮಾರಸ್ವಾಮಿ ಅವರು ಗೆಲ್ಲುವ ರಾಜಕಾರಣ ಮಾಡಬೇಕೆ ವಿನಾ ಸೋಲಿಸುವ ರಾಜಕಾರಣವನ್ನಲ್ಲ. ಸೋಲಿಸಲು ಸ್ಪರ್ಧೆ ಮಾಡುವುದು ಒಳ್ಳೆಯ ರಾಜಕಾರಣವಲ್ಲ. ದೇವೇಗೌಡ ಅವರಿಂದ ಕುಮಾರಸ್ವಾಮಿ ಅವರು ಒಳ್ಳೆಯ ರಾಜಕಾರಣ ಕಲಿತಿಲ್ಲ’ ಎಂದರು.