ಫೇಸ್‌ಬುಕ್ ಪ್ರೊಫೈಲ್‌ಗೂ ಬೀಗಹಾಕಬಹುದು!

ಇದೀಗ ಹೊಸ ವೈಶಿಷ್ಟ್ಯವನ್ನು ಫೇಸ್‌ಬುಕ್ ಪರಿಚಯಿಸುತ್ತಿದೆ. ಇದು ಪ್ರೊಫೈಲ್ ಫೋಟೋವನ್ನು ಲಾಕ್ ಮಾಡುವ 'ಪ್ರೊಫೈಲ್ ಪಿಕ್ಚರ್ ಗಾರ್ಡ್'ನ ಮುಂದುವರಿದ ಭಾಗ. ಅಂದರೆ, ನಮ್ಮ ಇಡೀ ಪ್ರೊಫೈಲನ್ನೇ ಲಾಕ್ ಮಾಡುವುದು. ಈ ರೀತಿ ಮಾಡಿದರೆ, ನಮ್ಮ ಪ್ರೊಫೈಲ್ ಚಿತ್ರವಷ್ಟೇ ಅಲ್ಲದೆ, ನಮ್ಮ ಯಾವುದೇ ಅಪ್‌ಡೇಟ್‌ಗಳು ಕೂಡ ನಮ್ಮ ಸ್ನೇಹಿತರಲ್ಲದವರಿಗೆ ಕಾಣಿಸುವುದಿಲ್ಲ. ಇದು ನಮ್ಮ ಪ್ರೊಫೈಲನ್ನೇ ಲಾಕ್ ಮಾಡುವ ವಿಧಾನ.

ಈ ಲಾಕ್ ಆನ್ ಮಾಡಿಟ್ಟುಕೊಂಡರೆ, ನೀಲಿ ಬಣ್ಣದ ಬ್ಯಾಡ್ಜ್ ಒಂದು ಕಾಣಿಸುತ್ತದೆ. ನಾವು ಮಾಡುವ ಯಾವುದೇ ಪೋಸ್ಟ್‌ಗಳು ನಮ್ಮ ಸ್ನೇಹಿತರಿಗೆ ಮಾತ್ರವೇ ಕಾಣಿಸುತ್ತದೆ. ಪೋಸ್ಟ್ ಮಾಡುವಾಗಲೇ 'ಪಬ್ಲಿಕ್' ಆಗಿ ಪೋಸ್ಟ್ ಮಾಡಲಾಗುವುದಿಲ್ಲ ಎಂಬ ಎಚ್ಚರಿಕೆಯುಳ್ಳ ಸಂದೇಶವೊಂದು ಪಾಪ್-ಅಪ್ ಆಗುತ್ತದೆ.

ಈ ಸೌಕರ್ಯವು ಭಾರತದ ಫೇಸ್‌ಬುಕ್ ಬಳಕೆದಾರರಿಗೂ ಹಂತಹಂತವಾಗಿ ಪರಿಚಯಿಸಲಾಗುತ್ತಿದ್ದು, ಕೆಲವರಿಗೆ ಈಗಾಗಲೇ ಲಭ್ಯವಾಗಿದೆ.