ಬೆಂಗಳೂರು: 100ಕ್ಕೂ ಅಧಿಕ ರಾಷ್ಟ್ರಗಳಲ್ಲಿ ಕಾರ್ಯಾಚರಿಸುತ್ತಿರುವ ಜನಪ್ರಿಯ ಮೆಸೇಜಿಂಗ್ ಅಪ್ಲಿಕೇಶನ್ ವಾಟ್ಸ್ಆ್ಯಪ್, ಬಳಕೆದಾರರಿಗೆ ಹೊಸ ಫೀಚರ್ ಪರಿಚಯಿಸಲು ಮುಂದಾಗಿದೆ.
ಹೊಸ ಅಪ್‌ಡೇಟ್‌ನಲ್ಲಿ ಸ್ಟೇಟಸ್ ಪೋಸ್ಟ್ ಮತ್ತು ವಾಟ್ಸ್ಆ್ಯಪ್ ಮೂಲಕ ಕಳುಹಿಸಲಾಗುವ ಫೋಟೊ, ವಿಡಿಯೊಗಳನ್ನು ಇನ್ನಷ್ಟು ಹೆಚ್ಚು ಕ್ರಿಯಾಶೀಲವಾಗಿ ಎಡಿಟ್ ಮಾಡಲು ಅನುಕೂಲವಾಗುವ ಟೂಲ್‌ಗಳನ್ನು ಒದಗಿಸಲಾಗುತ್ತದೆ.
ನೂತನ ವಾಟ್ಸ್ಆ್ಯಪ್ ಆಂಡ್ರಾಯ್ಡ್ ಬೀಟಾ ಆವೃತ್ತಿಯಲ್ಲಿ ಹೊಸ ಟೂಲ್‌ಗಳನ್ನು ಕಂಪನಿ ಪರಿಶೀಲಿಸುತ್ತಿದೆ. ಈ ಬಗ್ಗೆ ವಾಬೀಟಾ ಇನ್ಫೋ ವರದಿ ಮಾಡಿದೆ.
ಪರಿಶೀಲನೆ ಮುಗಿದ ಬಳಿಕ, ಹೊಸ ಅಪ್‌ಡೇಟ್‌ ಬಿಡುಗಡೆಯಾಗಲಿದೆ. ಆ ಸಂದರ್ಭದಲ್ಲಿ ಎಲ್ಲ ಬಳಕೆದಾರರು ಇದರ ಪ್ರಯೋಜನ ಪಡೆಯಬಹುದು.
ವಾಟ್ಸ್ಆ್ಯಪ್ ಮೂಲಕ ಕಳುಹಿಸಲಾಗುವ ಫೋಟೊ, ವಿಡಿಯೊದಲ್ಲಿ ಆಕರ್ಷಕ ಡ್ರಾಯಿಂಗ್, ಬರಹ, ಎಮೋಜಿಗಳನ್ನು ಬಳಸಿ ಇನ್ನಷ್ಟು ಚಂದಗಾಣಿಸಲು ಹಲವರು ಥರ್ಡ್‌ ಪಾರ್ಟಿ ಅಪ್ಲಿಕೇಶನ್ ಬಳಸುತ್ತಿದ್ದಾರೆ. ಅದರ ಬದಲು, ವಾಟ್ಸ್ಆ್ಯಪ್ ಅಪ್ಲಿಕೇಶನ್‌ನಲ್ಲಿಯೇ ಹೊಸ ಆಯ್ಕೆ ಪರಿಚಯಿಸಲಿದೆ.
