ಸೋಮವಾರ, ಜನವರಿ 20, 2020
26 °C

'ಸೂರ್ಯನ ಓಂಕಾರ'ದ ವಿಡಿಯೊ ಹಂಚಿಕೊಂಡ ಕಿರಣ್‌ ಬೇಡಿ; ಫೇಕ್‌ ಎಂದ ಟ್ವೀಟಿಗರು

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಕಿರಣ್‌ ಬೇಡಿ ಟ್ವಿಟರ್‌ನಲ್ಲಿ ಹಂಚಿಕೊಂಡಿರುವ ಸೂರ್ಯನ ಓಂಕಾರದ ವಿಡಿಯೊ

ಬೆಂಗಳೂರು: ಜೀವ ಜಗತ್ತಿನ ಉಳಿವಿಗೆ ಕಾರಣವಾಗಿರುವ ''ಸೂರ್ಯ 'ಓಂ‘ ಜಪಿಸುತ್ತಿದ್ದಾನೆ, ನಾಸಾ ಅದರ ಶಬ್ದವನ್ನು ರೆಕಾರ್ಡ್‌ ಮಾಡಿದೆ''- ಇಂಥದ್ದೇ ಒಕ್ಕಣೆ ಹೊಂದಿರುವ ವಿಡಿಯೊ ಹಂಚಿಕೊಂಡಿರುವ ಪುದುಚೇರಿ ಲೆಫ್ಟಿನೆಂಟ್‌ ಗವರ್ನರ್‌ ಕಿರಣ್‌ ಬೇಡಿ ಟ್ವಿಟರ್‌ನಲ್ಲಿ ಟ್ರೋಲ್‌ ಆಗಿದ್ದಾರೆ. 

ಶನಿವಾರ ಬೆಳಿಗ್ಗೆ ನಿವೃತ್ತಿ ಐಪಿಎಸ್‌ ಅಧಿಕಾರಿ ಕಿರಣ್‌ ಬೇಡಿ ಹಂಚಿಕೊಂಡ ವಿಡಿಯೊಗೆ ಟ್ವೀಟಿಗರು ವ್ಯಂಗ್ಯದ ಪ್ರತಿಕ್ರಿಯೆಗಳನ್ನು ನೀಡಿದ್ದಾರೆ. ಈಗಾಗಲೇ 7,900ಕ್ಕೂ ಹೆಚ್ಚು ಬಾರಿ ಮರುಹಂಚಿಕೆಯಾಗಿ 8,000ಕ್ಕೂ ಅಧಿಕ ಪ್ರತಿಕ್ರಿಯೆಗಳು ದಾಖಲಾಗಿವೆ. 

ಯಾವುದೇ ಬರಹಗಳಿಲ್ಲದೆ 'ಸೂರ್ಯನ ಓಂಕಾರ'ದ ವಿಡಿಯೊ ಹಂಚಿಕೊಂಡಿರುವ ಕಿರಣ್‌ ಬೇಡಿ ಅವರಿಗೆ ಇದೊಂದು ಫೇಕ್‌ ವಿಡಿಯೊ ಎಂದು ಹಲವು ಟ್ವೀಟಿಗರು ತಿಳಿಸಿದ್ದಾರೆ. ಇನ್ನೂ ಕೆಲವರು ಸಿನಿಮಾ ತುಣುಗಳು, ಪೋಸ್ಟರ್‌, ಫೋಟೊಗಳ ಮೂಲಕ ಕಾಲೆಳೆದಿದ್ದಾರೆ. 

ಸೂರ್ಯನ ವಾತಾವರಣದಲ್ಲಿ ಉಂಟಾಗುತ್ತಿರುವ ಶಬ್ದಕ್ಕೆ ಸಂಬಂಧಿಸಿದಂತೆ ಒಂದು ಆಡಿಯೊ–ವಿಡಿಯೊ ರೆಕಾರ್ಡ್‌ನ್ನು ನಾಸಾ 2018ರಲ್ಲಿ ಹಂಚಿಕೊಂಡಿತ್ತು. 

'ಸೂರ್ಯ ನಿಶ್ಯಬ್ದಿಯಾಗಿಲ್ಲ. ತರಂಗಗಳಿಂದ ಹೊರಡುತ್ತಿರುವ ಸದ್ದು ಸೌರ ದ್ರವ್ಯದ ಸಂಚಾರವನ್ನು ತಿಳಿಸುತ್ತದೆ. ಇದು ಸೂರ್ಯನ ಒಳಭಾಗದ ಅಧ್ಯಯನ ಮಾಡಲು ವಿಜ್ಞಾನಿಗಳಿಗೆ ಸಹಕಾರಿಯಾಗುತ್ತದೆ' ಎಂದು ಟ್ವೀಟ್‌ನೊಂದಿಗೆ ಹಂಚಿಕೊಳ್ಳಲಾಗಿತ್ತು. 

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು