ಚೀನಾದಲ್ಲಿ ಮತ್ತೆ ಹೆಚ್ಚಿದ ಒಮೈಕ್ರಾನ್‌

ಈಶಾನ್ಯ ಭಾಗದಲ್ಲಿರುವ ಜಿಲಿನ್ ಪ್ರಾಂತ್ಯದಲ್ಲಿ 895, ಶೆನ್‌ಝೆನ್‌ನಲ್ಲಿ 75 ಹೊಸ ಪ್ರಕರಣಗಳು ಪತ್ತೆಯಾಗಿವೆ.ವೈರಸ್ ಹೆಚ್ಚಳದ ಕಾರಣಕ್ಕೆ 1.7 ಕೋಟಿ ಜನಸಂಖ್ಯೆ ಇರುವ ಹಾಗೂ ತಾಂತ್ರಿಕ ಮತ್ತು ಹಣಕಾಸು ಹಬ್ ಖ್ಯಾತಿಯ ಶೆನ್‌ಝೆನ್ ನಗರದಲ್ಲಿ ಲಾಕ್‌ಡೌನ್ ಜಾರಿಯಾಗಿದೆ.

ಅಲ್ಲದೆ 6 ಕೋವಿಡ್ ಪ್ರಕಣಗಳು ಪತ್ತೆಯಾದ ಬೀಜಿಂಗ್ ಮತ್ತು 41 ಪ್ರಕರಣಗಳು ದಾಖಲಾದ ಶಾಂಘೈನಲ್ಲಿ ಸೋಂಕಿತರು ಪತ್ತೆಯಾದ ನಿವಾಸಗಳು ಮತ್ತು ಕಚೇರಿ ಕಟ್ಟಡಗಳನ್ನು ಲಾಕ್‌ಡೌನ್ ಮಾಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಚೀನಾದಲ್ಲಿ ಅಮೆರಿಕ, ಯುರೋಪ್ ಸೇರಿದಂತೆ ಇನ್ನಿತರ ದೇಶಗಳಿಗಿಂತಲೂ ಕಡಿಮೆ ಪ್ರಕರಣಗಳು ದಾಖಲಾಗುತ್ತಿವೆ. ಆದರೆ, 2020ರಲ್ಲಿ ಚೀನಾದ ವುಹಾನ್‌ನಲ್ಲಿ ಕೋವಿಡ್ ಆರಂಭವಾದ ಬಳಿಕ ಇದೀಗ ಮತ್ತೆ ಸೋಂಕು ಹೆಚ್ಚಳವಾಗುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ.

ದೇಶದಲ್ಲಿ ಕೋವಿಡ್‌ಗೆ ಬಲಿಯಾಗುವವರ ಸಂಖ್ಯೆ ಕಡಿಮೆಯಿದೆ. ಆದರೆ, ಇದರಿಂದ ವೈದ್ಯಕೀಯ ಸಂಪನ್ಮೂಲಗಳ ಮೇಲೆ ಒತ್ತಡ, ಸಾಮಾಜಿಕ ಜೀವನದ ಮೇಲೆ ಹೊಡೆತ ಹಾಗೂ ಕುಟುಂಬ ಮತ್ತು ಸಮಾಜದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತದೆ. ಒಂದು ವೇಳೆ ನಿರ್ಬಂಧಗಳನ್ನು ಹಿಂಪಡೆದರೆ, ಅತ್ಯಂತ ಕಡಿಮೆ ಅವಧಿಯಲ್ಲಿ ಹೆಚ್ಚು ಮಂದಿಯಲ್ಗಿ ಸೋಂಕು ವ್ಯಾಪಿಸಲು ಕಾರಣವಾಗಲಿದೆ ಎಂದು ರೋಗಾಣು ತಜ್ಞ ಝಾಂಗ್ ವೆನ್‌ಹಾಂಗ್ ತಿಳಿಸಿದ್ದಾರೆ.

ಚೀನಾದ ಇನ್ನಿತರ ನಗರಗಳು ಮತ್ತು ಪ್ರಾಂತ್ಯಗಳಲ್ಲಿ ನೂರಾರು ಕೋವಿಡ್ ಪ್ರಕರಣಗಳು ಪತ್ತೆಯಾಗಿವೆ. ಏತನ್ಮಧ್ಯೆ, ಹಾಂಗ್‌ಕಾಂಗ್‌ನಲ್ಲಿ ಸೋಮವಾರ ಒಂದೇ ದಿನ 26,908 ಪ್ರಕರಣಗಳು ದಾಖಲಾಗಿದ್ದು, 249 ಮಂದಿ ಕೋವಿಡ್‌ಗೆ ಬಲಿಯಾಗಿದ್ದಾರೆ.