ವಾಷಿಂಗ್ಟನ್: ಅಮೆರಿಕದ ಚುನಾಯಿತ ಅಧ್ಯಕ್ಷ ಜೊ ಬೈಡನ್ ಅವರ ಬಲಗಾಲಿನ ಪಾದದ ಮೂಳೆಯಲ್ಲಿ ಕೂದಲೆಳೆಯಷ್ಟು ಸೀಳು ಕಾಣಿಸಿಕೊಂಡಿದೆ. ನಡೆದಾಡಲು ಅನುಕೂಲವಾಗುವ ಬೂಟುಗಳನ್ನು ಅವರು ಕೆಲವು ವಾರಗಳ ಕಾಲ ಧರಿಸಬೇಕಾಗುತ್ತದೆ ಎಂದು ವೈದ್ಯರು ಹೇಳಿದ್ದಾರೆ.
ತಮ್ಮ ಸಾಕು ನಾಯಿಯೊಂದಿಗೆ ಶನಿವಾರ ಆಟವಾಡುವ ವೇಳೆ ಅವರು ಜಾರಿ ಬಿದ್ದಿದ್ದರು. ಅವರ ಹಿಮ್ಮಡಿ ಕೂಡ ಹೊರಳಿತ್ತು.
‘ಎಕ್ಸ್ರೇ ಮಾಡಿದ ಸಂದರ್ಭದಲ್ಲಿ ಪಾದದ ಮೂಳೆಯಲ್ಲಿ ಸೀಳು ಕಾಣಿಸಿಕೊಂಡಿರುವುದು ಗೊತ್ತಾಗಲಿಲ್ಲ. ಮತ್ತಷ್ಟು ಪರೀಕ್ಷೆಗಳನ್ನು ನಡೆಸಿದ ನಂತರ ಗೊತ್ತಾಯಿತು’ ಎಂದು ಬೈಡನ್ ಅವರಿಗೆ ಚಿಕಿತ್ಸೆ ನೀಡುತ್ತಿರುವ ವೈದ್ಯ ಕೆವಿನ್ ಒಕೂನರ್ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.