ಶಾಂಘೈ: ಸೋಂಕಿತರಿಗೆ ಆರೈಕೆಗೆ ಮನೆ ಒಪ್ಪಿಸಲು ಪೊಲೀಸರ ಆದೇಶ –ಜನರ ಅಕ್ರೋಶ

ನಗರದಲ್ಲಿ ದಿನನಿತ್ಯ 20 ಸಾವಿರ ಪ್ರಕರಣಗಳು ವರದಿಯಾಗುತ್ತಿದ್ದು, ರೋಗಿಗಳ ಆರೈಕೆಗೆ 10 ಸಾವಿರ ಹಾಸಿಗೆ ಸಾಮರ್ಥ್ಯವುಳ್ಳ ತಾತ್ಕಾಲಿಕ ಆಸ್ಪತ್ರೆಗಳನ್ನು ನಿರ್ಮಿಸಲಾಗುತ್ತಿದೆ. ಆದರೂ ಎಲ್ಲ ರೋಗಿಗಳಿಗೆ ಹಾಸಿಗೆ ಒದಗಿಸಲು ಸಾಧ್ಯವಾಗುತ್ತಿಲ್ಲ. ಇದರಿಂದ ರೋಗಿಗಳಿಗೆ ಚಿಕಿತ್ಸೆ ನೀಡಲು 39 ಕುಟುಂಬಗಳಿಗೆ ಮನೆ ಖಾಲಿ ಮಾಡುವಂತೆ ಆದೇಶಿಸಲಾಗಿದೆ. ಇದರಿಂದ ಸ್ಥಳೀಯರು ಮತ್ತು ಪೊಲೀಸರ ನಡುವೆ ವಾಗ್ವಾದ ಆರಂಭಗೊಂಡಿದೆ.

ನಿವಾಸಿಗಳನ್ನು ಪೊಲೀಸರು ಹೊಡೆಯುತ್ತಿದ್ದಾರೆ ಎಂದು ಆರೋಪಿಸಿದಕ್ಕಾಗಿಯೇ ಹಲವು ಮಂದಿಯನ್ನು ಬಂಧಿಸಲಾಗಿದೆ ಎಂಬುದು ವಿಡಿಯೊ ಒಂದರಿಂದ ತಿಳಿದು ಬಂದಿದೆ.

ಶಾಂಘೈನಲ್ಲಿ ಮೂರನೇ ವಾರ ಲಾಕ್‌ಡೌನ್‌ ಮುಂದುವರಿದಿದ್ದು, ಜನರು ನಿರಂತರವಾಗಿ ಹತಾಶೆ ಮತ್ತು ಅಕ್ರೋಶವನ್ನು ಹೊರ ಹಾಕುತ್ತಿದ್ದಾರೆ. ಸೋಂಕು ನಿಯಂತ್ರಣದಲ್ಲಿ ಅಧಿಕಾರಿಗಳ ವೈಫಲ್ಯ, ಆಹಾರ ಕೊರತೆ, ಸಾಕು ಪ್ರಾಣಿಗಳನ್ನು ಕೊಲ್ಲುವ ಹಾಗೂ ಸೋಂಕಿತ ಮಕ್ಕಳನ್ನು ಪೋಷಕರಿಂದ ಬೇರ್ಪಡಿಸುವ ಆರೋಗ್ಯ ಕಾರ್ಯಕರ್ತರ ಅತಿರೇಕದ ಕ್ರಮ ಹಾಗೂ ಕಠಿಣನಿರ್ಬಂಧಗಳು ಜನರನ್ನು ಕಂಗಾಲಾಗಿಸಿವೆ.