ಕೋವಿಡ್ ಬಿ1617 ರೂಪಾಂತರಿ ವಿರುದ್ಧ ಅಮೆರಿಕದ ಲಸಿಕೆ ಪರಿಣಾಮಕಾರಿ: ಅಧಿಕಾರಿಗಳು

ವಾಷಿಂಗ್ಟನ್: ಅಮೆರಿಕದಿಂದ ಅಂಗೀಕೃತಗೊಂಡಿರುವ ಫೈಜರ್, ಮಾಡರ್ನಾ ಮತ್ತು ಜಾನ್ಸನ್ ಆ್ಯಂಡ್ ಜಾನ್ಸನ್‌ ಕೋವಿಡ್-19 ಲಸಿಕೆಗಳು ಭಾರತದಲ್ಲಿ ಕಂಡುಬಂದಿರುವ ಬಿ1617 ರೂಪಾಂತರಿ ವೈರಸ್ ವಿರುದ್ಧ ಪರಿಣಾಮಕಾರಿಯಾಗಿದೆ ಎಂದು ಅಮೆರಿಕದ ಉನ್ನತ ಆರೋಗ್ಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಭಾರತದಲ್ಲಿ ಕಂಡುಬಂದಿರುವ ರೂಪಾಂತರಿ ವೈರಸ್‌ ಹಾಗೂ ಅಮೆರಿಕದ ಮೂರು ಪ್ರಮುಖ ಲಸಿಕೆಗಳ ಇತ್ತೀಚಿನ ಅಂಕಿಅಂಶಗಳನ್ನು ಆಧರಿಸಿ ಇದನ್ನು ಹೇಳಲಾಗಿದೆ ಎಂದು ರಾಷ್ಟ್ರೀಯ ವಿಜ್ಞಾನ ಸಂಸ್ಥೆಯ ನಿರ್ದೇಶಕ ಡಾ. ಫ್ರಾನ್ಸಿಸ್ ಕಾಲಿನ್ಸ್ ತಿಳಿಸಿದ್ದಾರೆ.

ಇದನ್ನೂ ಓದಿ: ಭಾರತದ ಕೋವಿಡ್‌–19 ಮಾದರಿ 44 ರಾಷ್ಟ್ರಗಳಲ್ಲಿ ಪತ್ತೆ: ಡಬ್ಲ್ಯುಎಚ್‌ಒ

ಅಂಕಿಅಂಶಗಳ ಪ್ರಕಾರ ಅಮೆರಿಕ ಅಂಗೀಕೃತ ಫೈಜರ್, ಮಾಡರ್ನಾ ಮತ್ತು ಜಾನ್ಸನ್ ಆ್ಯಂಡ್ ಜಾನ್ಸನ್ ಲಸಿಕೆಗಳು ಭಾರತದಲ್ಲಿರುವ ಬಿ1617 ರೂಪಾಂತರಿ ಕೋವಿಡ್ ವೈರಸ್ ವಿರುದ್ಧ ಪರಿಣಾಮಕಾರಿಯೆನಿಸಿದೆ. ಅಮೆರಿಕನ್ನರನ್ನು ರಕ್ಷಿಸಲು ಇದರಿಂದ ಸಹಾಯವಾಗಲಿದೆ ಎಂದು ಹೇಳಿದ್ದಾರೆ.

ಇದಕ್ಕೂ ಮೊದಲು ಭಾರತದಲ್ಲಿ ಮೊತ್ತ ಮೊದಲು ಕಂಡುಬಂದಿರುವ ಬಿ1617 ಸಾರ್ಸ್ ಕೋವ್-2 ವೈರಾಣು ಅತ್ಯಂತ ಕಳವಳಕಾರಿ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಘೋಷಿಸಿದ್ದು, ಹೆಚ್ಚು ವೇಗವಾಗಿ ಹರಡಬಲ್ಲದು ಎಂದು ಎಚ್ಚರಿಸಿದೆ.