ಅವರು ಮಬ್ಬು ಬೆಳಕಿನ ಆ ಚಿತ್ರಮಂದಿರದಲಿ
ಕುಳಿತಿದ್ದರು ಮೊದಲೇ ಬಂದು
ಶುರುವಾಗುವ ಮೊದಲು ಕಪ್ಪು ಬಿಳುಪಿನ ಛಾಯಾಪುಟ
ಮುಗ್ಗರಿಸಿ ತಡವರಿಸುತ್ತ ಮುಂದಿನವರ ಕಾಲು ತುಳಿಯುತ್ತ
ಪ್ರತೀ ಸಿನಿಮಾಕ್ಕೂ ತಡವಾಗಿ ಹೋಗುವುದು
ನಮ್ಮ ಖಯಾಲಿ
ತುಸು ಬೆನ್ನು ಬಾಗಿಸಿಯೇ ನಡೆದಿದ್ದೇವೆ ಹುಚ್ಚರಂತೆ
ಥಿಯೇಟರಿನವನು ಬಿಟ್ಟ ಕಿರು ಬೆಳಕಲ್ಲಿ
ಕೈಯೆತ್ತಿ ಕಣ್ಣಗಲಿಸಿ ಮೆಟ್ಟಿಲ ಸವರುತ್ತ
ಒಳಗಿನ ಕತ್ತಲೆಗೆ ಕಣ್ಣುಹೊಂದಿಸಿಕೊಂಡ ಅವರಿಗೆ
ಸುತ್ತಲಿನ ವಿಶ್ವ ಸ್ಪಷ್ಟಚಿತ್ರ
ನಮ್ಮ ಹುಚ್ಚಾಟ ಕಂಡು ಮುಗುಳ್ನಕ್ಕಿದ್ದಾರೆ
ನೆಂಚಿಕೊಂಡು ಸಿನಿಮಾದ ಹಾಸ್ಯದ ಜತೆಗೆ
ಬೆಳಕಿಗೆ ಬಂದರೆ ಮಾತ್ರ
ನಮ್ಮ ಚಹರೆಗಳು ಬದಲಾಗುವವು
ಹಾಗೂ ಹೀಗೂ ಅಲ್ಲೊಂದು ಇಲ್ಲೊಂದು ಸೀಟು ಗಿಟ್ಟಿಸಿಕೊಂಡ ನಾವು
ಒಂದಾಗಿ ಅವರೊಡನೆ ನಕ್ಕಾಗ
ನಕ್ಕು ಅತ್ತಾಗ ಅತ್ತು ಸಿನಿಮಾದ ಭಾಗವೇ ಆಗಿಹೋಗಿದ್ದೇವೆ
ಥೇಟು ಅವರಂತೆ
ಇನ್ನೇನು ಬಿಡಬೇಕು ಚಿತ್ರಮಂದಿರವ
ಎಲ್ಲೆಡೆ ಬೆಳಕಾಗುವ ಮೊದಲು
ಮುಂದಿನ ಪಾಳಿಗಾಗಿ ಅವರನ್ನೂ ಕೈಹಿಡಿದು
ನಡೆಸಬೇಕು ಮತ್ತೆ ಮುಗ್ಗರಿಸುತ್ತ ತಡವರಿಸುತ್ತ
ಮಬ್ಬು ಕತ್ತಲಲ್ಲಿ
ಮಜಾ ಅಂದರೆ ಈ ಸಲ ನಮ್ಮ ದೆಸೆಯಿಂದ ಅವರೂ
ನಮ್ಮಂತಾಗಿದ್ದಾರೆ!
