ಚಿಕ್ಕೋಬನಹಳ್ಳಿ ಚಾಂದ್ ಬಾಷ ಅವರ ಕವನ: ಜೋಡಿಸುವುದೆಂದರೆ.........?

ನನ್ನ ಹರಿದ ಚಪ್ಪಲಿಯ ಉಂಗುಷ್ಟ 
ನಾನೇ ಹೊಲಿದುಕೊಳ್ಳಲು ನನಗೆ ತುಂಬಾ ಇಷ್ಟ
ಮೆಟ್ಟಿದ್ದು ನಾನೇ ಹರಿದದ್ದು ನಾನೇ
ಸವೆಯುವವರೆವಿಗೂ ಕಾಲ್ಬೆರಳೊಂದಿಗಿನ ಬಂಧ
ಗಟ್ಟಿಯಾಗಿರಬಹುದೆಂಬ ಆಶಾಭಾವನೆಯಿಂದ
ದೂರಾದ ಸಂಬಂಧಗಳ?

ಮುರಿದುಹೋದ ಕುರ್ಚಿಯ ಕಾಲುಗಳ
ನಾನೇ ಜೋಡಿಸಿಕೊಳ್ಳಲು ನನಗೆ ತುಂಬಾ ಇಷ್ಟ
ಕುಳಿತದ್ದು ನಾನೇ ಮುರಿದದ್ದು ನಾನೇ
ಕಾಲು ಹೋದಮೇಲೆ ಕೈ
ಹಿಡಿಯಬಹುದೆಂಬ ನಂಬಿಕೆಯಿಂದ
ಮುರಿದ ಬಾಂಧವ್ಯಗಳ?

ಒಡೆದ ಗಡಿಗೆಯ ಕಂಟ 
ನಾನೇ ಮರುಜೋಡಿಸಲು ನನಗೆ ತುಂಬಾ ಇಷ್ಟ
ಬಳಸಿದ್ದು ನಾನೇ ಒಡೆದದ್ದು ನಾನೇ
ತಾಪವಾದಾಗ ತಂಪು ನೀರು 
ಸಿಗಬಹುದೆಂಬ ಆಸೆಯಿಂದ
ಒಡೆದ ಹೃದಯಗಳ?

ಜೋಡಿಸುವುದೆಂದರೆ ನನಗೆ ತುಂಬಾ ಇಷ್ಟ
ಇರೋವರೆಗೂ.....
ನನಗೆ ನೀನು
ನಿನಗೆ ನಾನು
ಆಸರೆಯಾಗಬಹುದೆಂಬ ಅನುಬಂಧದಿಂದ