ಗುರುವಾರ, 25 ಜುಲೈ 2024
×
ADVERTISEMENT
ಈ ಕ್ಷಣ :
ADVERTISEMENT

ಅನಿತಾ ತಾಕೊಡೆ ಅವರ ಕವಿತೆ- ‘ಹೆಜ್ಜೆಗಳು’

Last Updated 11 ಮಾರ್ಚ್ 2023, 18:45 IST
ಅಕ್ಷರ ಗಾತ್ರ

ಯಾರ ಆಸರೆಯೂ ಇಲ್ಲದೆ
ಮುಂದಡಿಯಿಡಲು ಹಂಬಲಿಸುತ್ತಿರುವಾಗ
ಅದೆಷ್ಟೋ ಬಾರಿ ಎಲ್ಲೆಂದರಲ್ಲಿ ಬಿದ್ದೆದ್ದು
ಗಟ್ಟಿಯಾಗಿ ಪಾದವೂರಿ ಹೆಜ್ಜೆಯಿಡಲಾರಂಭಿಸಿದ ಮೇಲೆ
ಎಂದೂ ನಿಂತಿದ್ದೇ ಇಲ್ಲ.

ಬಾಲ್ಯ ಬೆಳೆಯುತ್ತಿದ್ದಂತೆ ಹರೆಯ ಕರೆಯುತ್ತಿದ್ದಂತೆ
ತುಂಟಾಟದಲಿ ಒಡಮೂಡಿದ ಹೆಜ್ಜೆಗಳು
ಬಯಕೆಯೊಳತೆಕ್ಕೆಗೆ ಬಿದ್ದು ಹಾತೊರೆಯುತ್ತಲೇ
ಭರವಸೆಯ ಪುಟದೊಳಗೆ ಅಚ್ಚಾದವು ಕೆಲವು

ಬಾಳ ಪಯಣದ ಕವಲು ದಾರಿಯಲ್ಲಿ
ಹೆಜ್ಜೆಗಳು ಪರಿಪಕ್ವತೆಯೆಡೆಗೆ ಹೊರಳುತ್ತಿರುವಾಗ
ಘನ ಹಗುರವಾಗಿ ತಕ್ಕಡಿಯಲ್ಲಿ ತೂಗಿರಬಹುದು
ಹಸಿಬಿಸಿ ತಂಗಾಳಿಯೊಡಲಲ್ಲಿ ಜೀಕಿರಬಹುದು
ಅಲೆಗಳ ಏರಿಳಿತದೊಳಗೆ ಮುಳುಗೇಳಿರಬಹುದು
ಇನ್ನೇನು ನಿಂತೇ ಬಿಡುತ್ತವೋ ಎನ್ನುವಷ್ಟರಲ್ಲಿ
ಮತ್ತೆದ್ದು ಹಟಮಾರಿಯಾಗಿರಬಹುದು

ಹಿಂತಿರುಗಲೂ ಆಗದೆ, ನಿಲ್ಲಲೂ ಒಗ್ಗದೆ
ಕ್ಷಣ ದಿನ ವರುಷ ದಶಕಗಳಾಗಿ ಶತಮಾನದತ್ತ ತಿರುಗಿ
ಹೆಜ್ಜೆಗಳು ಸಾಗುತ್ತಲೇ ಇವೆ.
ಭಾವ ಅನುಭಾವಗಳ ಹಾದಿ ಬೆಳೆಯುತ್ತಲೇ ಇವೆ

ಸಹಸ್ರಾರು ಹೆಜ್ಜೆಗಳ ಆಗರದೊಳಗೆ
ಜೊತೆ ನಡೆದವುಗಳೆಷ್ಟೋ...!
ಅರ್ಧದಲ್ಲೇ ಕಳಚಿಕೊಂಡವುಗಳೆಷ್ಟೋ..!
ರಂಗಿನೊಡಗೂಡಿ ಗಾಢವಾದವುಗಳೆಷ್ಟೋ...!

ಹೊತ್ತಿರುವ ಕಾಯ ತೀರ ಸೇರುವ ಭರದಲ್ಲಿ
ಸವೆದಿವೆ ಕಾಲ್ಬೆರಳ ತುದಿಯಲ್ಲಿ ಜನ್ಮದಿಂದ ದತ್ತವಾದ
ಶಂಖ ಚಕ್ರಗಳ ಕುರುಹು

ಜೀವನಯಾನಕೆ ದಾನವಾಗಿ ದಕ್ಕಿದ ದೇಹವನೂ
ಎಂದಾದರೊಂದು ದಿನ ತೊರೆದು
ಮುನ್ನಡೆಯಬೇಕು ಬೇರೊಂದು ಗರ್ಭದೊಳಗೆ
ಹೊಸದೊಂದು ಲೋಕದ ಹೊಸದಾದ ಬೆಳಕಿಗೆ
ಮತ್ತೆ ಮೊದಲಿನಿಂದಲೇ ಅನುವಾಗಬೇಕು
ಹೆಜ್ಜೆಗಳ ಮೊಹರಾಗಬೇಕು

ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT