ಭಾನುವಾರ, ಮಾರ್ಚ್ 29, 2020
19 °C

ಕವಿತೆ | ಲಿಪ್ ಸ್ಟಿಕ್ ಸುಂದರಿಯರು

ಸುಬ್ರಾಯ ಚೊಕ್ಕಾಡಿ Updated:

ಅಕ್ಷರ ಗಾತ್ರ : | |

Prajavani

ಜೀನ್ಸ್ ನಲ್ಲೋ ಮಿನಿ ಮ್ಯಾಕ್ಸಿಗಳಲ್ಲೋ
ಚೂಡಿಯಲ್ಲೋ ವೈವಿಧ್ಯಮಯ ಸೀರೆಗಳಲ್ಲೋ
ತೇಲಿ ಬರುತ್ತಾರೆ ತೂರಿ ಬರುತ್ತಾರೆ ಜಾರಿ ಬರುತ್ತಾರೆ
ಕ್ಯಾಟ್ ವಾಕಿನಲಿ
ತುಡುಗಿಯರು ಬೆಡಗಿಯರು ಬೆರಗಿಯರು ಅಹಹಾ!
ಲಿಪ್ ಸ್ಟಿಕ್ ಸುಂದರಿಯರು...

ಝಗಮಗದ ಉಡುಪು ಮೇಕಪ್ಪಿನಲಿ
ಪ್ರಾಯ ಬಚ್ಚಿಡುತ್ತಾ
ಹೊರ ಜಗತ್ತಿಗೆ ತಮ್ಮ
ವೈಯಾರ ಬಿಚ್ಚಿಡುತ್ತಾ
ಹಾಯ್ ಹೆಲೋ ಅನ್ನುತ್ತಾರೆ ತುಸುವೇ
ತುಟಿ ಕೊಂಕಿಸಿ ಕೆಂಪ ಸುರಿಸುತ್ತಾ
ದಂತಪಂಕ್ತಿಯ ಮಿಂಚ ಹೊಳೆಸುತ್ತಾ
ಆಗೀಗೊಮ್ಮೆ ಮರೆಯಲ್ಲಿ ವ್ಯಾನಿಟಿಯಿಂದ
ಕನ್ನಡಿಯೆತ್ತಿ
ತುಟಿ ಕೆಂಪ ಬಿರುಕ ಸರಿಪಡಿಸುತ್ತಾ
ಸಣ್ಣಗೆ ನಗುವ ಕಿರುಹರಿವ ಹಾಯಿಸುತ್ತಾ....

ಪಬ್ಬಿನಲಿ ಗ್ಲಾಸಿಗೆ ಸ್ಪರ್ಶಿಸಿಯೂ
ಸ್ಪರ್ಶಿಸದ ಹಾಗೆ ತುಟಿಯಿಟ್ಟ ಗುರುತಿನ್ನೂ
ಉಳಿದೇ ಇದೆ ಮೈಯ
ಗಂಧವಿನ್ನೂ ಗಾಳಿಯಲಿ ತೇಲಾಡಿದೆ ಆಡಿದ
ಮಾತುಗಳಿನ್ನೂ ಚೆಲ್ಲಾಪಿಲ್ಲಿ ಹರಡಿದೆ ಇಲ್ಲಿ
ಎಲ್ಲ ಈ ಬೆಡಗಿಯರ ಆಗಮನ ನಿರ್ಗಮನದ
ಗುರುತಾಗಿ

ಹಿಂದಿರುಗಿದ ಈ ಬೆಡಗಿಯರು
ಸೇರುತ್ತಾರೆ ತಮ್ಮ
ಖಾಸಗಿ ಕೋಣೆಗಳಿಗೆ
ತೆಗೆಯುತ್ತಾರೆ ತಮ್ಮ ಮೇಕಪ್ಪುಗಳ ತೊಳೆದು
ವಿದಾಯ ಹೇಳುತ್ತಾರೆ ತಮ್ಮ
ಝಗಮಗದ ಉಡುಪಿಗೆ ತುಟಿಗೆಂಪಿಗೆ

ಕನ್ನಡಿಯಲಿಣುಕಿದರೆ
ಗುಳಿಬಿದ್ದ ಕಣ್ಣ ಕಪ್ಪನೆಯ ತುಟಿಯ
ನೆರಿಗೆಯ ಮುಖವ
ಕಂಡಂತಾಗಿ
ಯಾರ ಮುಖವಿದು ಎಂದು ಗಾಬರಿಯಾಗಿ
ಕಡು ನಿರಾಶೆಯಲಿ ಕಂಗಾಲಾಗಿ
ಚೆಲ್ಲುತ್ತಾರೆ ತಮ್ಮದೇ ದೇಹವನು
ಹಾಸಿಗೆಯಲ್ಲಿ--

ಯಕ್ಷಗಾನದ ಸ್ತ್ರೀವೇಷದ ಹಿರಿಯ
ತನ್ನ ಚೆಲ್ಲಾಟದ ಆಟವನ್ನೆಲ್ಲ ಮುಗಿಸಿ
ಚೌಕಿಗೆ ಹೋಗಿ
ವೇಷ ಕಳಚಿ ಮೇಕಪ್ ಒರೆಸಿ
ಉರುಳಿಕೊಂಡಂತೆ ಚಾಪೆಯಲ್ಲಿ
ನಾಳಿನ ಚಿಂತೆಯಲ್ಲಿ...

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು