ಶನಿವಾರ, ಅಕ್ಟೋಬರ್ 1, 2022
19 °C

ಫಾಲ್ಗುಣ ಗೌಡ ಅಚವೆ ಅವರ ಕವನ 'ಮಂಗಟ್ಟೆ'

ಫಾಲ್ಗುಣ ಗೌಡ ಅಚವೆ Updated:

ಅಕ್ಷರ ಗಾತ್ರ : | |

Prajavani

ಆ ಕಾಡಿನ ಮತ್ತು ಈ ಕಾಡಿನ
ಮಂಗಗಳ ನಡುವೆ ನಡೆಯುವ ಗಡಿ ತಂಟೆಯ ಬಗ್ಗೆಯೇ ಮಾತನಾಡುತ್ತಿದ್ದ ಮರಗಳು ಹಗಲಲ್ಲೂ
ನಿದ್ದೆ ಹೋಗಿವೆ ಮಂಜು ಹೊದ್ದು

ಸಮೀಕ್ಷೆಗೆ ಹೊರಟ ಹೆಲಿಕಾಪ್ಟರ್‌ಗಳಂತೆ
ಮಂಗಟ್ಟೆಗಳು ಹಾರುವ ರಭಸ
ಜೋಂಪಿಗೆ ಸರಿದ ಕಾಡುಗಳನ್ನೆಬ್ಬಿಸುವುದು

ಹಿಕ್ಕೆ ಬಿದ್ದಲ್ಲೇ ಬೀಜ ಮೊಳೆತು
ಎದ್ದು ನಿಲ್ಲುತ್ತದೆ ಮಳೆ ಕಾಡು
ಕಳಗಲ ಗೊಂಬಳ ಇಪ್ಪೆ ಬಸವನಕೊಟ್ಟೆ ಕವಲು ಹೋದಲ್ಲೇ ಬಿದ್ದು ದಟ್ಟ ಕವಲೊಡೆದು ಕತ್ತಲಾದಂತೆ
ಹಗಲಲ್ಲು ಭಾಸ

ಸೀತೆಯ ಹೊತ್ತ ರಾವಣನ ತಡೆದ ರಾಮಾಯಣದ ಜಟಾಯು ಇವನೇ
ಏಕ ಪತ್ನಿಯ ವೃತದ ಚಿರಾಯು
ಸೀತೆಯ ರಾಮನಂತೆ

ಕಡಿಯುವ ಕೊಡಲಿಯನ್ನು ಏನು ಮಾಡಲಾಗುವುದಿಲ್ಲ
ನೋವಿನ ಮುಖ ಹೊತ್ತು
ಚುರುಕ್ ಅನ್ನುತ್ತದೆ ಕರುಳು
ಬೀಜ ರೂಪದ ಹಿಕ್ಕೆ
ಮೌನ ಪ್ರತಿಭಟನೆ

ಹಾಲಕ್ಕಿ ಕರೆವಕ್ಕಲು ಗಾಮೊಕ್ಕಲು ಒಕ್ಕಲಿಗರಂತೆ
ಹಲ್ಕಿಸ್ಕ ಮಂಗಟ್ಟೆ ಕುಡೋಲಕ್ಕಿ ಒಂದೆರಡೇ
ಸದಾ ಸಮತೋಲಿಸುವ ಕಾಡಿಗೆ
ಸ್ತಬ್ಧಗೊಂಡ ಕಾಡು ಕನಸಲ್ಲಿ
ಬೆಚ್ಚಿ ಬೀಳುವುದು ಜಾವದ ಕೂಗಿಗೆ
ನಿದ್ದೆಯ ಜೋಂಪಿಗೆ ಸರಿದ ಹಕ್ಕಿಗಳು ಕಾಲ್ತಪ್ಪುವವು
ಎಚ್ಚೆತ್ತುಕೊಳ್ಳುವುದು ಕೋಳಿ ತಲೆಯ ಜೈವಿಕ ಗಡಿಯಾರ

ಆಕಾಶವಾಣಿಯ ವಂದನಾ ಕಾರ್ಯಕ್ರಮ ಕೇಳುತ್ತ ಕೂತ ಕಾಜಾಣಗಳು
ಆವರಿಸಿದ ಗಾಢ ಚಳಿ ತಾಳಲಾರದೇ ಮೂಡುದಿಕ್ಕಿಗೆ ಹೊರಟ ಬೆಳ್ಳಕ್ಕಿಗಳ ಜೊತೆ
ರೇಡಿಯೋ ಎತ್ತಿಕೊಂಡೇ ಹೋಗುವುದ ಕಂಡು
ಬೆಚ್ಚನೆ ಎಳೆಬಿಸಿಲು ಮೋಡಗಳ ನೋಕುವುದು

ಹೆಬ್ಬಲಸು ಬಸವನ ಕೊಟ್ಟೆಗೆ ಹಣ್ಣಾದರೆ ಮಂಗಟ್ಟೆಗೆ ಮಿಲನೋತ್ಸವ ಸುಗ್ಗಿ
ತಟಾರಿಬೊಳೆ ಮೋತಿಗುಡ್ಡ ಔಲ್ ಗದ್ದೆಯ ಕಾಡಿಗೆ
ಪ್ರತಿದಿನ ವನಮಹೋತ್ಸವ ಹುಗ್ಗಿ

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು