ಅಲ್ಲಿರುವ ಮಕ್ಕಳ ದೊಡ್ಡ ಗುಂಪಲ್ಲಿ ನನಗೆ ಬಹಳವಾಗಿ ಆಕರ್ಷಿಸಿದ್ದು, ಅಲ್ಲೇ ರಸ್ತೆ ಪಕ್ಕ ನಿಂತುಕೊಂಡು ಎಲ್ಲೋ ಸಿಕ್ಕ ಸೈಕಲ್ ಚಕ್ರದ ಟಯರ್ಗಳನ್ನು ಹಿಡಿದು ಆಟವಾಡುತ್ತಿದ್ದ ಮೂವರು ಮಕ್ಕಳು. ಆ ಗುಂಪಿನ ಪುಟ್ಟ ಹುಡುಗಿ, ತನ್ನಲ್ಲಿರುವ ಟಯರ್ ಸರಿಯಿಲ್ಲವೆಂದೂ, ‘ನನಗೆ ನಿನ್ನ ಸೈಕಲ್ ಟಯರ್ ಕೊಡು’ ಎಂದು ಗುಂಪಿನ ಹುಡುಗನ ಬಳಿ ಹಟ ಹಿಡಿದಿದ್ದಳು. ಅಲ್ಲಿದ್ದ ಕೆಂಪು ಬ್ಯಾಗಿನ ಹುಡುಗ, ಆಕೆಯ ಮೇಲೆ ಒಂದು ಚೂರೂ ರೇಗದೇ ತನ್ನಲ್ಲಿರುವ ಚಂದದ ಟಯರ್ ಅನ್ನು ಆಕೆಗೆ ನೀಡಿದಾಗ, ಆ ಹುಡುಗಿಯ ಮುಖ ಪೂರಿಯಂತೆ ಅರಳಿತು. ಆಮೇಲೆ ಮೂವರೂ ಸೇರಿ ಖುಷಿಯಿಂದ ಆಟ ಶುರು ಮಾಡಿದರು.