ಸೋಮವಾರ, ಜನವರಿ 27, 2020
26 °C

ಅಂಡಾಣು ಬೆಳವಣಿಗೆ ಉದ್ದೀಪಿಸುವ ಚೋದಕ ಪತ್ತೆ!

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ವಾಷಿಂಗ್ಟನ್ (ಪಿಟಿಐ): ಬಂಜೆತನದಿಂದ ಬಳಲುತ್ತಿರುವ ಮಹಿಳೆಯರಿಗೊಂದು ಸಿಹಿಸುದ್ದಿ!

ಮಹಿಳೆಯರ ಗರ್ಭಾಶಯದಲ್ಲಿ ಅಂಡ ಕೋಶ (ಫಾಲಿಕಲ್) ಮತ್ತು ಅಂಡಾಣು ಬೆಳವಣಿಗೆ ಉದ್ದೀಪಿಸುವ ಚೋದಕ ಯಾವುದೆಂಬುದನ್ನು (ಹಾರ್ಮೋನ್) ವಿಜ್ಞಾನಿಗಳು ಕಂಡುಹಿಡಿದಿದ್ದು, ಇದು ಮಹಿಳೆಯರಲ್ಲಿ ಸಂತಾನೋತ್ಪತ್ತಿಗೆ ನೆರವಾಗಲಿದೆ.



ಈ ಚೋದಕವು ಬಂಜೆತನ ಹಾಗೂ ಸರಿಯಾಗಿ ಗರ್ಭಕಟ್ಟದ ಮಹಿಳೆಯರಿಗೆ ವರದಾನವಾಗಲಿದೆ ಎಂದು ವಿಜ್ಞಾನಿಗಳು ಅಭಿಪ್ರಾಯಪಟ್ಟಿದ್ದಾರೆ.



ಸ್ಟ್ಯಾನ್‌ಫೋರ್ಡ್ ಮತ್ತು ಜಪಾನಿನ ಅಕಿರಾ ವಿಶ್ವವಿದ್ಯಾಲಯದ ವಿಜ್ಞಾನಿಗಳು `ಆರ್-ಸ್ಪಾನ್‌ಡಿನ್2' ಹೆಸರಿನ ಈ ಚೋದಕವನ್ನು ಪತ್ತೆ ಹಚ್ಚಿದ್ದಾರೆ. ಗರ್ಭಕೋಶದಲ್ಲಿ ಇನ್ನೂ ಫಲಿತವಾಗದಿರುವ ಅಂಡಾಣುವನ್ನು `ಆರ್-ಸ್ಪಾನ್‌ಡಿನ್2' ಚೋದಕವು ಫಲಿತವಾಗುವಂತೆ ಉದ್ದೀಪಿಸುತ್ತದೆ ಎಂದು ಕ್ಯಾಲಿಫೋರ್ನಿಯಾದ ಸ್ಟ್ಯಾನ್‌ಫೋರ್ಡ್ ವೈದ್ಯಕೀಯ ವಿವಿಯ ಸಂತಾನೋತ್ಪತ್ತಿ, ಪ್ರಸೂತಿ ಮತ್ತು ಕಾಂಡಕೋಶ ವಿಜ್ಞಾನ ವಿಭಾಗದ ಸಂಶೋಧಕ ಆರಾನ್ ಜೆ.ಡಬ್ಲ್ಯು ಹುಷೆ ಹೇಳಿದ್ದಾರೆ.



ಇಲಿಗಳ ಮೇಲೆ ಪ್ರಯೋಗ ಯಶಸ್ವಿ: ಪ್ರೋಟೀನ್‌ನಿಂದ ಕೂಡಿದ ಅಂಡಾಣುಗಳನ್ನು ಪ್ರನಾಳದಲ್ಲಿಟ್ಟು `ಆರ್-ಸ್ಪಾನ್‌ಡಿನ್2' ಚೋದಕ ಸೇರಿಸಿ ಹೆಣ್ಣು ಇಲಿಗಳ ಗರ್ಭಕೋಶದಲ್ಲಿ ಇರಿಸಲಾಯಿತು. ಚೋದಕದ ಪ್ರಭಾವದಿಂದಾಗಿ ಇಲಿಗಳ ಅಂಡಾಶಯದಲ್ಲಿ ಸಂತಾನೋತ್ಪತ್ತಿಗೆ ಪೂರಕವಾಗುವ ಫಲಿತ ಅಂಡಾಣುಗಳು ಬಿಡುಗಡೆಯಾದವು. ಈ ರೀತಿ  ಫಲಿತಗೊಂಡ ಅಂಡಾಣುಗಳು ಇಲಿಗಳು ಗರ್ಭ ಧರಿಸುವಲ್ಲಿ ಮುಖ್ಯ ಪಾತ್ರ ವಹಿಸಿದವು ಎಂದು ತಜ್ಞರು ವಿವರಿಸಿದ್ದಾರೆ.

ಪ್ರತಿಕ್ರಿಯಿಸಿ (+)