ಅಥ್ಲೀಟ್‌ಗಳಿಗೆ 123 ಕೋಟಿ ರೂ. ಖರ್ಚು: ಮಾಕನ್

ನವದೆಹಲಿ (ಪಿಟಿಐ): `ಲಂಡನ್ ಒಲಿಂಪಿಕ್ಸ್‌ಗೆ ತರಬೇತಿ ಪಡೆಯುತ್ತಿರುವ ಅಥ್ಲೀಟ್‌ಗಳಿಗೆ ಈಗಾಗಲೇ 123.73 ಕೋಟಿ ರೂಪಾಯಿ ಖರ್ಚು ಮಾಡಲಾಗಿದೆ~ ಎಂದು ಕೇಂದ್ರ ಕ್ರೀಡಾ ಸಚಿವ ಅಜಯ್ ಮಾಕನ್ ತಿಳಿಸಿದ್ದಾರೆ.

`ತರಬೇತಿಯ ಉದ್ದೇಶಕ್ಕಾಗಿ ಫೆಬ್ರುವರಿ 29ರ ಒಳಗೆ ಈ ಹಣ ವೆಚ್ಚ ಮಾಡಲಾಗಿದೆ. ಒಲಿಂಪಿಕ್ಸ್ ತರಬೇತಿಗೆ ಒಟ್ಟು 258 ಕೋಟಿ ರೂಪಾಯಿ  ಮೀಸಲಿಡಲಾಗಿದೆ~ ಎಂದು ಮಂಗಳವಾರ ಲೋಕಸಭೆಗೆ ಲಿಖಿತ ರೂಪದಲ್ಲಿ ನೀಡಿದರು.

`ಕ್ರೀಡಾ ಫೆಡರೇಷನ್‌ಗಳು ನಿರಂತರವಾಗಿ ನಮ್ಮ ಜೊತೆ ಸಂಪರ್ಕದಲ್ಲಿವೆ. ಅಥ್ಲೀಟ್‌ಗಳಿಗೆ ನೀಡುತ್ತಿರುವ ತರಬೇತಿ ಬಗ್ಗೆ ಭಾರತೀಯ ಕ್ರೀಡಾ ಪ್ರಾಧಿಕಾರ (ಎಸ್‌ಎಐ) ಹಾಗೂ ಪರಿಣಿತರು ಮಾಹಿತಿ ನೀಡುತ್ತಿದ್ದಾರೆ~ ಎಂದೂ ಹೇಳಿದ್ದಾರೆ.

ಶೂಟರ್‌ಗಳಿಗೆ 13 ಕೋಟಿ: ಒಲಿಂಪಿಕ್ಸ್‌ಗೆ ಸಜ್ಜುಗೊಳ್ಳಲು ಶೂಟರ್‌ಗಳಿಗೆ 13 ಕೋಟಿ ರೂಪಾಯಿಯನ್ನು ಬಿಡುಗಡೆ ಮಾಡಲಾಗಿದೆ.

`13 ಕೋಟಿ ರೂ. ಯಲ್ಲಿ 12.5 ಕೋಟಿ ರೂಪಾಯಿಯನ್ನು ಕೇಂದ್ರ ಕ್ರೀಡಾ ಸಚಿವಾಲಯ ನೀಡಿದೆ. ಇನ್ನುಳಿದ ಐದು ಕೋಟಿ ರೂ. ಹಣವನ್ನು ಈ ವಾರದ ಅಂತ್ಯದಲ್ಲಿ ನೀಡುವ ವಿಶ್ವಾಸವಿದೆ~ ಎಂದು ಭಾರತ ರಾಷ್ಟ್ರೀಯ ರೈಫಲ್ ಸಂಸ್ಥೆ (ಎನ್‌ಆರ್‌ಎಐ) ಅಧ್ಯಕ್ಷ ರಣಿಂದರ್ ಸಿಂಗ್ ಹೇಳಿದ್ದಾರೆ.

ಅಭಿನವ್ ಬಿಂದ್ರಾ, ರೊಂಜನ್ ಸೋಧಿ, ಮನವ್‌ಜಿತ್ ಸಿಂಗ್, ಗಗನ್ ನಾರಂಗ್, ಸಂಜೀವ್ ರಜಪೂತ್, ರಾಹಿ ಸರ್ನೋಬತ್ ಹಾಗೂ ಅನುರಾಗ್ ಸಿಂಗ್ ಇತರ ಶೂಟರ್‌ಗಳು ತರಬೇತಿ ಪಡೆಯುತ್ತಿದ್ದಾರೆ.