ಭಾನುವಾರ, ಜೂನ್ 20, 2021
26 °C

ಈ ಬಾರಿಯೂ ಅಪರಾಧ ಹಿನ್ನೆಲೆಯವರಿಗೇ ಮಣೆ!

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ನವದೆಹಲಿ: ಲೋಕಸಭಾ ಚುನಾವಣೆಗೆ ಕೆಲವು ರಾಜಕೀಯ ಪಕ್ಷಗಳು ತಮ್ಮ ಅಭ್ಯರ್ಥಿಗಳ ಮೊದಲ ಪಟ್ಟಿಯನ್ನು ಈಗಾಗಲೇ ಬಿಡುಗಡೆ ಮಾಡಿವೆ.



ಮಾರ್ಚ್‌ 2ನೇ ತಾರೀಖಿನವರೆಗೆ ವಿವಿಧ ಪಕ್ಷಗಳ 203 ಅಭ್ಯರ್ಥಿಗಳ ಹೆಸರು ಪ್ರಕಟಗೊಂಡಿದೆ. ಇವರಲ್ಲಿ 70 ಅಭ್ಯರ್ಥಿಗಳು ಈ ಹಿಂದೆ ಲೋಕಸಭೆ­/ರಾಜ್ಯಸಭೆ ಇಲ್ಲವೇ ವಿಧಾನಸಭಾ ಚುನಾವಣೆಗಳಲ್ಲಿ ಸ್ಪರ್ಧಿಸಿದವರು.



ಇವರು ಈ ಹಿಂದೆ ಚುನಾವಣಾ ಆಯೋಗಕ್ಕೆ ಸಲ್ಲಿಸಿದ್ದ ಪ್ರಮಾಣಪತ್ರ­, ಆಸ್ತಿವಿವರಗಳನ್ನು  ಪ್ರಜಾಪ್ರಭುತ್ವ ಸುಧಾರಣೆಗಳ ಸಂಸ್ಥೆ (ಎಡಿಆರ್‌) ಮತ್ತು ರಾಷ್ಟ್ರೀಯ  ಚುನಾವಣಾ ನಿಗಾ ಸಂಸ್ಥೆ (ಎನ್‌ಇಡಬ್ಲ್ಯು) ಒಟ್ಟಾಗಿ ವಿಶ್ಲೇಷಿಸಿವೆ.



ಈ ಅಭ್ಯರ್ಥಿಗಳು ಈಗ ಹೊಂದಿರುವ ಆಸ್ತಿ ಹಾಗೂ ಎದುರಿಸುತ್ತಿರುವ ಅಪರಾಧ ಪ್ರಕರಣಗಳ ಕುರಿತ ಹೊಸ ಮಾಹಿತಿಗಳು ಅವರು 2014ರ ಚುನಾವಣೆಗಾಗಿ ಪ್ರಮಾಣಪತ್ರ ಸಲ್ಲಿಸಿದ ಬಳಿಕವಷ್ಟೇ ತಿಳಿಯಲಿದೆ.

ವಿಶ್ಲೇಷಣಾ ವರದಿ ವಿವರ

(ಈ ಹಿಂದೆ ಸಲ್ಲಿಸಿರುವ ಪ್ರಮಾಣಪತ್ರದ ಆಧಾರದಲ್ಲಿ)

*ಅಪರಾಧ ಪ್ರಕರಣ

70 ಅಭ್ಯರ್ಥಿಗಳಲ್ಲಿ  34 ಮಂದಿ (ಶೇ 49ರಷ್ಟು) 224 ಅಪರಾಧ ಪ್ರಕರಣಗಳನ್ನು ಎದುರಿಸುತ್ತಿದ್ದಾರೆ.

ಶಿವಸೇನೆಯು ಕಣಕ್ಕಿಳಿಸಿರುವ 14 ಅಭ್ಯರ್ಥಿಗಳಲ್ಲಿ 12, ಬಿಜೆಪಿಯ 32 ಅಭ್ಯರ್ಥಿಗಳಲ್ಲಿ 13 ಮಂದಿ ಅಪರಾಧ ಪ್ರಕರಣಗಳನ್ನು ಎದುರಿಸುತ್ತಿ­ದ್ದಾರೆ. ಎನ್‌ಸಿಪಿ ಪ್ರಕಟಿಸಿರುವ 13 ಸ್ಪರ್ಧಿಗಳಲ್ಲಿ 8 ಜನ ಇಂತಹ ಪ್ರಕರಣಗಳಲ್ಲಿ ಆರೋಪಿಗಳಾಗಿದ್ದರು.

*ಗಂಭೀರ ಕ್ರಿಮಿನಲ್‌ ಪ್ರಕರಣ

70 ಅಭ್ಯರ್ಥಿಗಳಲ್ಲಿ  20 ಜನರು ಅತಿ ಗಂಭೀರ ಅಪರಾಧ ಪ್ರಕರಣಗಳನ್ನು ಎದುರಿಸುತ್ತಿದ್ದರು.




*ಹತ್ಯೆ ಮತ್ತು ಅದಕ್ಕೆ ಸಂಬಂಧಿಸಿದ ಪ್ರಕರಣಗಳು

ತಮ್ಮ ವಿರುದ್ಧ ಕೊಲೆ, ಹತ್ಯೆ ಯತ್ನ ಪ್ರಕರಣ ದಾಖಲಾಗಿದೆ ಎಂದು ನಾಲ್ವರು ಅಭ್ಯರ್ಥಿ ಪ್ರಮಾಣ ಪತ್ರದಲ್ಲಿ ಘೋಷಿಸಿಕೊಂಡಿದ್ದರು.



*ಆಸ್ತಿ ವಿವರ 

70 ಅಭ್ಯರ್ಥಿಗಳ ಸರಾಸರಿ ಆಸ್ತಿ ಮೌಲ್ಯ ₨5.76 ಕೋಟಿ ಇತ್ತು.



*ಕೋಟ್ಯಧಿಪತಿಗಳ ಸಂಖ್ಯೆ

70 ಅಭ್ಯರ್ಥಿಗಳಲ್ಲಿ 36 (ಶೇ 51ರಷ್ಟು) ಮಂದಿ ಕೋಟ್ಯಧಿಪತಿ­ಗಳಾಗಿದ್ದರು. ಪಕ್ಷವಾರು ಕೋಟ್ಯಧಿಪತಿಗಳು: ಶಿರೋಮಣಿ ಅಕಾಲಿದಳದಲ್ಲಿ 5, ಎನ್‌ಸಿಪಿಯಲ್ಲಿ 9, ಬಿಜೆಪಿಯಲ್ಲಿ 13, ಎಐಎಡಿಎಂಕೆಯಲ್ಲಿ ಒಬ್ಬರು ಕೋಟ್ಯಧಿಪತಿಗಳಿದ್ದರು.

*ಪುನರಾಯ್ಕೆ ಬಯಸಿದವರು: 70 ಅಭ್ಯರ್ಥಿಗಳಲ್ಲಿ 29 ಮಂದಿ ಪ್ರಸ್ತುತ ಲೋಕಸಭಾ ಸದಸ್ಯರಾಗಿದ್ದಾರೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.