ಕರ್ಣಾಟಕ ಬ್ಯಾಂಕ್ ಲಾಭ ₹97 ಕೋಟಿ

ಮಂಗಳೂರು: ಕರ್ಣಾಟಕ ಬ್ಯಾಂಕ್‌ ಪ್ರಸಕ್ತ ಹಣಕಾಸು ವರ್ಷದ ಮೂರನೇ ತ್ರೈಮಾಸಿಕದಲ್ಲಿ ₹96.91 ಕೋಟಿ ನಿವ್ವಳ ಲಾಭ ಗಳಿಸಿದೆ. ಡಿಸೆಂಬರ್‌ ಅಂತ್ಯಕ್ಕೆ ಕೊನೆಗೊಂಡ ಮೊದಲ ಒಂಬತ್ತು ತಿಂಗಳ ಅವಧಿಯಲ್ಲಿ ಬ್ಯಾಂಕ್‌ ₹309 ಕೋಟಿ ನಿವ್ವಳ ಲಾಭ ಗಳಿಸಿದೆ.



ಬ್ಯಾಂಕ್‌ನ ಒಟ್ಟು ನಿವ್ವಳಲಾಭ ಮತ್ತು ತ್ರೈಮಾಸಿಕ ಅವಧಿಯ ನಿವ್ವಳ ಲಾಭ ಎರಡ ರಲ್ಲೂ ತುಸು ಇಳಿಕೆ ಯಾಗಿದೆ. 2014–15ನೇ ಸಾಲಿನ ಮೊದಲ ಒಂಬತ್ತು ತಿಂಗಳಲ್ಲಿ ₹317 ಕೋಟಿ ಲಾಭಗಳಿಸಿತ್ತು. ಈ ವರ್ಷದ 3ನೇ ತ್ರೈಮಾಸಿಕ ಅವಧಿಯಲ್ಲಿ ಬ್ಯಾಂಕ್‌ ಲಾಭವು ₹107 ಕೋಟಿಗಳಷ್ಟಾಗಿದೆ ಎಂದು ಬ್ಯಾಂಕ್‌ನ ವ್ಯವಸ್ಥಾಪಕ ನಿರ್ದೇಶಕ  ಪಿ.ಜಯರಾಮ ಭಟ್‌ ಅವರು ಶನಿವಾರ ತಿಳಿಸಿದರು.



9 ತಿಂಗಳ ಅವಧಿಯಲ್ಲಿ ಬ್ಯಾಂಕ್‌ ₹600 ಕೋಟಿ ನಿರ್ವಹಣಾ ಲಾಭ ಗಳಿಸಿದೆ. ಹಿಂದಿನ ವರ್ಷ ಇದೇ ಅವಧಿ ಯಲ್ಲಿ ₹534 ಕೋಟಿ ನಿರ್ವಹಣಾ ಲಾಭ ಗಳಿಸಿತ್ತು. ₹82,592 ಕೋಟಿ ಮೊತ್ತದ ವಹಿವಾಟು ನಡೆಸಿದ್ದು, ಒಟ್ಟು ವಹಿವಾಟಿ ನಲ್ಲಿ ಶೇ 9.92ರಷ್ಟು ಏರಿಕೆಯಾಗಿದೆ.