ಕಾಯ್ದೆ ರೂಪಿಸಲು ಕಾರಣ ಏನು?

ಬೆಂಗಳೂರು: ರಾಜ್ಯದಲ್ಲಿ 1993–94ರಲ್ಲಿ ಜಾರಿಗೆ ಬಂದ ಸಾಮಾನ್ಯ ಪ್ರವೇಶ ಪರೀಕ್ಷಾ ಪದ್ಧತಿ (ಸಿಇಟಿ) 2002ರವರೆಗೂ ದೇಶಕ್ಕೆ ಮಾದರಿ­ಯಾಗಿತ್ತು. ಆದರೆ, 2002ರಲ್ಲಿ ಟಿಎಂಎ ಪೈ ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್‌ ನೀಡಿ­ದ ತೀರ್ಪಿನಿಂದಾಗಿ ಖಾಸಗಿ ಕಾಲೇಜು­ಗಳ ಮೇಲೆ ಸರ್ಕಾರಕ್ಕೆ ಯಾವುದೇ   ಹಿಡಿ­ತ ಇಲ್ಲ­ದಂತಾಯಿತು.



ಖಾಸಗಿ ಕಾಲೇಜುಗಳು ಸರ್ಕಾರಕ್ಕೆ ಸೀಟುಗಳನ್ನು ನೀಡಬೇಕಾಗಿಲ್ಲ. ಆಯಾ ಕಾಲೇಜುಗಳು ಸ್ವತಂತ್ರವಾಗಿ ಸಿಇಟಿ ನಡೆಸಿ ವಿದ್ಯಾರ್ಥಿಗಳಿಗೆ ಪ್ರವೇಶ ನೀಡ­ಬಹುದು ಎಂದು 11 ಮಂದಿ ನ್ಯಾಯ­ಮೂರ್ತಿಗಳನ್ನು ಒಳಗೊಂಡ ಪೀಠ ಬಹು­ಮತದ ಆಧಾರದ ಮೇಲೆ ಹೇಳಿತು.



ಹನ್ನೊಂದು ಮಂದಿ ನ್ಯಾಯ­ಮೂರ್ತಿ­ಗಳ ­ಪೈಕಿ ಆರು ಮಂದಿ ಆಡಳಿತ ಮಂಡ­ಳಿಗಳ ಪರವಾಗಿ ನಿಲುವು ತಳೆದರೆ, 5 ಮಂದಿ ವಿರುದ್ಧವಾದ ನಿಲುವು ತಳೆದರು. ಅಂತಿಮವಾಗಿ ಬಹುಮತದ ಆಧಾರದ ಮೇಲೆ ತೀರ್ಪು ಹೊರಬಿತ್ತು.



ಆಗಿನಿಂದ ಸರ್ಕಾರ ಪ್ರತಿವರ್ಷ ಖಾಸಗಿ ಕಾಲೇಜುಗಳೊಂದಿಗೆ ಮಾತು­ಕತೆ ನಡೆಸಿ ಒಂದಷ್ಟು ಸೀಟುಗಳನ್ನು ಸರ್ಕಾರಿ ಕೋಟಾದಡಿ ಹಂಚಿಕೆ ಮಾಡು­ತ್ತಿತ್ತು. ಮಾತುಕತೆ ಮೂಲಕ ಶುಲ್ಕ ನಿಗದಿಯಾಗುತ್ತಿತ್ತು.



ಆದರೆ, ಖಾಸಗಿ ಕಾಲೇಜುಗಳು ಪ್ರತಿ ವರ್ಷ ಹೆಚ್ಚಿನ ಶುಲ್ಕ ನಿಗದಿ ಮಾಡು­ವಂತೆ ಪಟ್ಟು ಹಿಡಿಯುತ್ತಿದ್ದವು. ಅಲ್ಲದೆ ಸರ್ಕಾರಕ್ಕೆ ಬಿಟ್ಟುಕೊಡುತ್ತಿದ್ದ ಸೀಟುಗಳ ಪ್ರಮಾಣ ವರ್ಷದಿಂದ ವರ್ಷಕ್ಕೆ ಕಡಿಮೆ­ಯಾಗುತ್ತಿತ್ತು.



ಖಾಸಗಿ ಕಾಲೇಜುಗಳು ಸರ್ಕಾರದ ಮೇಲೆ ಸವಾರಿ ಮಾಡಲು ಹೊರಟಿವೆ. ಸರ್ಕಾರದ ಮಾತನ್ನು ಕೇಳುವುದಿಲ್ಲ ಎಂಬ ಕಾರಣಕ್ಕೆ 2006ರಲ್ಲಿ ಕಾಯ್ದೆ ರೂಪಿಸಿ ಕೆಲವೊಂದು ನಿರ್ಬಂಧ ವಿಧಿ­ಸಲು ಆಗಿನ ಸರ್ಕಾರ ಮುಂದಾ­ಯಿತು.



ವಿಧಾನಮಂಡಲದ ಉಭಯ ಸದನಗಳು ಒಪ್ಪಿಗೆ ನೀಡಿದ ಈ ಮಸೂ­ದೆಗೆ ರಾಜ್ಯಪಾಲರು ಅಂಗೀಕಾರ ನೀಡು­ತ್ತಿದ್ದಂತೆಯೇ ಕಾಯ್ದೆ ಆಯಿತು. ಆದರೆ, ಇದರಲ್ಲಿ ವಿದ್ಯಾರ್ಥಿಗಳಿಗೆ ಅನು­ಕೂಲ ಹಾಗೂ ಅನನುಕೂಲವಾದ ಅಂಶ­ಗಳು ಇದ್ದ ಕಾರಣ ತಕ್ಷಣವೇ ಜಾರಿ ಮಾಡದೆ ತಡೆ­ಹಿಡಿಯಲಾಗಿತ್ತು.



ಪ್ರತಿ ವರ್ಷ ಈ ಕಾಯ್ದೆಯನ್ನು ತಡೆಹಿಡಿದು ಪರಸ್ಪರ ಮಾತುಕತೆ ಮೂಲ­ಕವೇ ಸೀಟು ಹಂಚಿಕೆ ಮತ್ತು ಶುಲ್ಕ ನಿಗದಿ ಮಾಡಲಾಗುತ್ತಿತ್ತು. ಕಳೆದ ವರ್ಷ ಖಾಸಗಿ ಕಾಲೇಜುಗಳು ಶುಲ್ಕ ಹೆಚ್ಚ­ಳಕ್ಕೆ ಪಟ್ಟು ಹಿಡಿದ ಕಾರಣ, ಸರ್ಕಾರ ಕಾಯ್ದೆ ಜಾರಿಗೊಳಿಸುವುದಾಗಿ ಘೋಷಿಸಿತ್ತು.



ಆ ಪ್ರಕಾರ ಕಳೆದ ಜುಲೈನಲ್ಲಿ ನಡೆದ ವಿಧಾನಮಂಡಲದ ಅಧಿವೇಶನದಲ್ಲಿ ಕಾಯ್ದೆ ಜಾರಿಗೆ ಇದ್ದ ತಡೆಯನ್ನು ತೆರವುಗೊಳಿಸಲಾಯಿತು. 2014 – 15ನೇ ಸಾಲಿನಿಂದ ಕಾಯ್ದೆ ಜಾರಿಗೆ ಎರಡು ಸಮಿತಿಗಳನ್ನು ರಚಿಸುವ ಮೂಲಕ ಚಾಲನೆ ನೀಡಲಾಯಿತು.