ಮಂಗಳವಾರ, ಜೂನ್ 15, 2021
20 °C

ಕುಟುಂಬದೊಳಗೇ ಜಿದ್ದಾಜಿದ್ದಿ

ರಾಮರಡ್ಡಿ ಅಳವಂಡಿ/ ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ರಾಯಚೂರು: ರಾಯಚೂರು ಲೋಕ­ಸಭಾ ಕ್ಷೇತ್ರವು ಐದು ದಶಕಗಳಿಂದ ಕಾಂಗ್ರೆಸ್‌ನ ಭದ್ರಕೋಟೆ.  1957ರಿಂದ 2009 ರ ವರೆಗೆ ನಡೆದ ಚುನಾವಣೆ­ಗಳಲ್ಲಿ ಈ ಕ್ಷೇತ್ರದಲ್ಲಿ ಕಾಂಗ್ರೆಸ್ 12 ಬಾರಿ ಗೆಲುವು ಸಾಧಿಸಿದೆ. 1967ರಲ್ಲಿ ಸ್ವತಂತ್ರ ಅಭ್ಯರ್ಥಿ ಆರ್.ವಿ ನಾಯಕ, 1996ರಲ್ಲಿ  ಜನತಾದಳದ ರಾಜಾ ರಂಗಪ್ಪ ನಾಯಕ ಕಾಂಗ್ರೆಸ್ ಭದ್ರಕೋಟೆ ಭೇದಿಸಿದ್ದರು.



1998ರ ಬಳಿಕ ಮತ್ತೆ ಗೆದ್ದು ಅಧಿಕಾರದ ಗದ್ದುಗೆ ಏರಿ ಕುಳಿತಿದ್ದ ಕಾಂಗ್ರೆಸ್ ಪಕ್ಷವನ್ನು 2009 ರಲ್ಲಿ ಸೋಲಿಸುವ ಮೂಲಕ ಈ ಕ್ಷೇತ್ರದಲ್ಲಿ ಪ್ರಥಮ ಬಾರಿಗೆ ಬಿಜೆಪಿ ಖಾತೆ ತೆರೆ­ಯಿತು. ಬಿಜೆಪಿಯಿಂದ ಸ್ಪರ್ಧಿಸಿದ್ದ ಬಳ್ಳಾರಿ ಮೂಲದ (ಮಾಜಿ ಸಚಿವ ಬಿ ಶ್ರೀರಾಮುಲು ಅವರ ಸೋದರ ಸಂಬಂಧಿ) ಎಸ್.­ಫಕ್ಕೀರಪ್ಪ 30 ಸಾವಿ­ರಕ್ಕೂ ಹೆಚ್ಚು ಅಂತರದಿಂದ ಗೆದ್ದಿದ್ದರು.



ಹೊರಗಿನಿಂದ ಬಂದವರು ಹೇಗೆ ಗೆಲ್ಲಬಹುದು ಎಂಬುದನ್ನು  ಕ್ಷೇತ್ರದ ರಾಜಕಾರಣಿಗಳಿಗೆ ತೋರಿಸಿಕೊಟ್ಟರು. ಕ್ಷೇತ್ರ ಪುನರ್ವಿಂ­ಗ­ಡಣೆಯಲ್ಲಿ ಇದು ಪರಿಶಿಷ್ಟ ಪಂಗಡಕ್ಕೆ ಮೀಸಲಾಗಿದೆ.



ಎರಡು ಕುಟುಂಬಗಳ ಪೈಪೋಟಿ: ಈ ಕ್ಷೇತ್ರದಿಂದ ನಾಲ್ಕು ಬಾರಿ ಆಯ್ಕೆ­ಗೊಂಡಿದ್ದ ದೇವದುರ್ಗ ತಾಲ್ಲೂಕು ಅರಕೇರಿ ಗ್ರಾಮದ ವೆಂಕಟೇಶ ನಾಯಕ ಈಗ ದೇವದುರ್ಗ ವಿಧಾನಸಭಾ ಕ್ಷೇತ್ರದ ಸದಸ್ಯರು.2008ರ ದೇವದುರ್ಗ ವಿಧಾನಸಭಾ ಕ್ಷೇತ್ರದ ಉಪ ಚುನಾವಣೆಯಲ್ಲಿ ಶಿವನ­ಗೌಡ ನಾಯಕ ವಿರುದ್ಧ ಸ್ಪರ್ಧಿಸಿ ಪರಾಭವಗೊಂಡಿದ್ದ ಬಿ.ವಿ ನಾಯಕ ಅವರು ಈ ಚುನಾವಣೆ­ಯಲ್ಲಿ ಕಾಂಗ್ರೆಸ್ ಪಕ್ಷದ ಟಿಕೆಟ್‌ ಪಡೆಯಲು ಹರಸಾಹಸ ನಡೆಸಿದ್ದಾರೆ. ಅವರು ವೆಂಕಟೇಶ ನಾಯಕರ ಮಗ.



2013ರ ವಿಧಾನ ಸಭಾ ಚುನಾವಣೆಯಲ್ಲಿ ವೆಂಕಟೇಶ ನಾಯಕ ಅವರಿಂದ ಪ್ರಥಮ ಬಾರಿಗೆ ಸೋಲಿನ ರುಚಿ ಕಂಡ  ಅದೇ ಅರಕೇರಿ ಗ್ರಾಮದ ಮಾಜಿ ಸಚಿವ ಕೆ.ಶಿವನಗೌಡ ನಾಯಕ ಈಗ ಬಿಜೆಪಿ ಅಭ್ಯರ್ಥಿ. ವಿಶೇಷ ಎಂದರೆ ವೆಂಕಟೇಶ ನಾಯಕ ಅವರು ಸಂಬಂಧ­ದಲ್ಲಿ (ವೆಂಕಟೇಶ ನಾಯಕರ ತಂದೆ ಹಾಗೂ ಶಿವನಗೌಡ ನಾಯಕರ ಅಜ್ಜ ಸೋದರ ಸಂಬಂಧಿ­ಗಳು) ಶಿವನಗೌಡ ನಾಯಕರಿಗೆ ಅಜ್ಜ.



ಈಗೇನಾದರೂ ಕಾಂಗ್ರೆಸ್‌ ಟಿಕೆಟ್‌ ಬಿ.ವಿ. ನಾಯಕರಿಗೆ ಸಿಕ್ಕಿದರೆ ಈ ಕ್ಷೇತ್ರ ‘ಅಳಿಯ ಮತ್ತು ಮಾವನ’ ಕದನ ಕಾಣಲಿದೆ.

ದೇವದುರ್ಗ ವಿಧಾನ­ಸಭಾ ಕ್ಷೇತ್ರದ ಚುನಾವಣೆ ಅಬ್ಬರ, ಆರ್ಭಟ ಕಂಡಿರುವ ಬಿಜೆಪಿ ಮತ್ತು ಕಾಂಗ್ರೆಸ್ ಈ ಎರಡು ಕುಟುಂಬದವರೇ ಪ್ರಬಲ ಅಭ್ಯರ್ಥಿ­ಗಳೆಂದು ಪರಿಗಣಿಸಿವೆ.



2008ರಲ್ಲಿ ದೇವದುರ್ಗ ವಿಧಾನ­ಸಭಾ ಉಪ ಚುನಾವಣೆ­ಯಲ್ಲಿ ಮುಖಾ­ಮುಖಿಯಾಗಿದ್ದವರೇ ಐದು ವರ್ಷಗಳ ಬಳಿಕ ಮತ್ತೆ ಲೋಕಸಭಾ ಕ್ಷೇತ್ರದಲ್ಲಿ ತೊಡೆತಟ್ಟುವಂತಾಗಲಿದೆ. ದೇವದುರ್ಗ ವಿಧಾನಸಭಾ ಕ್ಷೇತ್ರಕ್ಕೆ ಮಾತ್ರ ಈವರೆಗೂ ಆವರಿಸಿ­ಕೊಂಡಿದ್ದ ಎರಡೂ ಕುಟುಂಬ­ಗಳ ಬದ್ಧ ವೈಷಮ್ಯದ ರಾಜಕಾರಣ ಈ ಮೂಲಕ ಲೋಕಸಭಾ ಕ್ಷೇತ್ರಕ್ಕೆ ‘ವರ್ಗಾವಣೆ’ ಆಗುವ ಸಾಧ್ಯತೆಯೂ ಇದೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.