ಗಿರಣಿ ವ್ಯವಸ್ಥಾಪಕ ಸೇರಿ 3 ಬಂಧನ

ಈರೋಡ್‌, ತಮಿಳುನಾಡು (ಪಿಟಿಐ): ಪೆರುಂದುರೈ ಬಳಿ ಮಂಗಳವಾರ ಬಟ್ಟೆ ಗಿರಣಿ ಬಣ್ಣ ಹಾಕುವ ಘಟಕದಲ್ಲಿ ಉಸಿರುಗಟ್ಟಿಸುವ ವಿಷಾನಿಲ ತುಂಬಿ­ಕೊಂಡಿದ್ದ ಟ್ಯಾಂಕ್‌ ಒಳಗೆ ಬಿದ್ದಿದ್ದ ಏಳು ಮಂದಿ ಸಾವನ್ನಪ್ಪಿದ್ದ ಪ್ರಕರಣಕ್ಕೆ ಸಂಬಂಧಿಸಿ ಘಟಕದ ವ್ಯವಸ್ಥಾಪಕರು ಸೇರಿದಂತೆ ಮೂವರನ್ನು ಪೊಲೀಸರು ಬುಧವಾರ ಬಂಧಿಸಿದ್ದಾರೆ.



ಮಾಲಿನ್ಯ ನಿಯಂತ್ರಣ  ಉಸ್ತುವಾರಿ ಹಾಗೂ ಕಾರ್ಮಿಕ ಕಲ್ಯಾಣ ಅಧಿಕಾರಿ­ಯನ್ನೂ ಬಂಧಿಸಲಾಗಿದೆ ಎಂದು ಪೊಲೀ­ಸರು ಮಾಹಿತಿ ನೀಡಿದ್ದಾರೆ.

ಐವರ ಶವವನ್ನು ಕುಟುಂಬ ಸದಸ್ಯರ ವಶಕ್ಕೆ ನೀಡಲಾಗಿದೆ. ಉಳಿದ ಇಬ್ಬರು ನೇಪಾಳದವರಾದ ಕಾರಣ ಇಲ್ಲೇ ಅವರ ಅಂತ್ಯಕ್ರಿಯೆ ನಡೆಸಲಾಗುವುದು ಎಂದು ಪೊಲೀ­ಸರು ಹೇಳಿದ್ದಾರೆ.



ಕಾರ್ಖಾನೆಗೆ ವಿದ್ಯುತ್‌ ಸಂಪರ್ಕ ಸ್ಥಗಿತ­ಗೊಳಿಸಿ, ಬಣ್ಣ ಹಾಕುವ ಘಟಕದ ಬಾಗಿಲನ್ನು ಮುಚ್ಚಿಸಲಾಗುವುದೆಂದು ಮಾಲಿನ್ಯ ನಿಯಂತ್ರಣ ಮಂಡಳಿಯ ಅಧಿ­ಕಾರಿಗಳು ಹೇಳಿದ್ದಾರೆ.



ಘಟನೆ ಹಿನ್ನೆಲೆ: ಇಬ್ಬರು ಕೆಲಸಗಾರರು ಮಂಗಳವಾರ ಅಕಸ್ಮಾತಾಗಿ ವಿಷಾನಿಲ ಟ್ಯಾಂಕ್‌ ಒಳಗೆ ಬಿದ್ದಿದ್ದಾರೆ.  ಅಲ್ಲೇ ಇದ್ದ ಐವರು ಅವರನ್ನು ಬಚಾವ್‌ ಮಾಡಲು ಟ್ಯಾಂಕ್‌ಗೆ ಹಾರಿದ್ದಾರೆ. ಘಟಕದಲ್ಲಿದ್ದ ಉಳಿದ ಕೆಲಸಗಾರರು ಮೋಟಾರು ದುರಸ್ತಿ ಕೆಲಸದಲ್ಲಿ ಮಗ್ನರಾಗಿದ್ದ ಕಾರಣ ಏಳೂ ಮಂದಿ ಸಾವನ್ನಪ್ಪಿದ್ದಾರೆ ಎಂದು ಮೂಲಗಳು ತಿಳಿಸಿವೆ.