ಸೋಮವಾರ, ಜೂನ್ 21, 2021
21 °C
ಕಿಮ್ಸ್‌ನ ಟಿಬಿ ಚಿಕಿತ್ಸಾ ಕೇಂದ್ರಕ್ಕೆ ಬಂದಿದೆ ‘ಜೀನ್‌ ಎಕ್ಸ್‌ಪರ್ಟ್‌’ ಉಪಕರಣ

ಟಿಬಿ ಪತ್ತೆಗೆ ಈಗ ಕೇವಲ ಎರಡೇ ತಾಸು

ಪ್ರಜಾವಾಣಿ ವಾರ್ತೆ/ ವಿಕ್ರಂ ಕಾಂತಿಕೆರೆ Updated:

ಅಕ್ಷರ ಗಾತ್ರ : | |

ಹುಬ್ಬಳ್ಳಿ: ಅತಿ ಶೀಘ್ರದಲ್ಲಿ ಮತ್ತು ಪರಿಣಾಮ­ಕಾರಿ­­ಯಾಗಿ ಕ್ಷಯರೋಗ ಪತ್ತೆ ಮಾಡಿ ರೋಗಿಗೆ ಸೂಕ್ತ ಸಮಯದಲ್ಲಿ ಚಿಕಿತ್ಸೆ ಸಿಗಲು ನೆರವಾಗುವ ‘ಪರಿಣಿತ’ ಉಪಕರಣ ನಗರದ ಕಿಮ್ಸ್‌ಗೆ ಬಂದಿದೆ. ಜೀನ್‌ ಎಕ್ಸ್‌ಪರ್ಟ್‌ ಎಂಬ ಈ ಉಪಕರಣ ಡಿಎನ್‌ಎ ಆಧರಿಸಿ ಜೀವಕೋಶದಲ್ಲಿರುವ ಕ್ಷಯವನ್ನು ಕೇವಲ ಎರಡು ತಾಸುಗಳಲ್ಲಿ ಪತ್ತೆ ಮಾಡುತ್ತದೆ.



ಕಿಮ್ಸ್‌ನ ಎರಡನೇ ಹಂತದ ಕ್ಷಯರೋಗ ಚಿಕಿತ್ಸಾ ಕೇಂದ್ರ ಮತ್ತು ಪ್ರಯೋಗಾಲಯದಲ್ಲಿ ಎರಡು ತಿಂಗಳಿಂದ ಕಾರ್ಯನಿರ್ವಹಿಸುತ್ತಿರುವ ಈ ಉಪಕರಣದಲ್ಲಿ ಈಗಾಗಲೇ 250ಕ್ಕೂ ಹೆಚ್ಚು ಮಾದರಿಗಳ ಪರೀಕ್ಷೆ ನಡೆದಿದ್ದು ಉತ್ತಮ ಫಲಿತಾಂಶ ಬಂದಿದೆ ಎಂದು ಹೇಳುತ್ತಾರೆ ಕೇಂದ್ರದ ಸಿಬ್ಬಂದಿ.



ಕ್ಷಯರೋಗದ ಪತ್ತೆಗೆ ಸಾಮಾನ್ಯವಾಗಿ ಲಿಕ್ವಿಡ್‌ ಕಲ್ಚರ್‌ ಟೆಸ್ಟ್‌, ಲೈನ್‌ ಪ್ರೋಬ್‌ ಅಸ್ಸೆ, ಸಾಲಿಡ್‌ ಕಲ್ಚರ್‌ ಟೆಸ್ಟ್‌ ಇತ್ಯಾದಿ ಮಾಡಲಾಗು­ತ್ತದೆ. ಎರಡನೇ ಹಂತದ ಕ್ಷಯರೋಗಿಗಳ ಪರೀಕ್ಷೆಗೆ ಕಿಮ್ಸ್‌ನಲ್ಲಿ ಈ ಹಿಂದೆ ಲೈನ್‌ ಪ್ರೋಬ್ ಅಸ್ಸೆ ಪರೀಕ್ಷೆ ಬಳಸಾಗುತ್ತಿತ್ತು. ಈಗ ಧಾರವಾಡ ಮತ್ತು ಬೆಳಗಾವಿ ಜಿಲ್ಲೆಯವ ರೋಗಿಗಳಿಗೆ ಮಾತ್ರ ಜೀನ್‌ ಎಕ್ಸ್‌ಪರ್ಟ್ ಪರೀಕ್ಷೆ ಮಾಡ­ಲಾಗು­ತ್ತದೆ. ಲಿಕ್ವಿಡ್‌ ಕಲ್ಚರ್‌ ಟೆಸ್ಟ್‌ ಮಾಡಿದರೆ ಫಲಿತಾಂಶಕ್ಕೆ 45 ದಿನ ಕಾಯಬೇಕು. ಲೈನ್‌ ಪ್ರೋಬ್‌ ಮಾಡಿದರೆ ಏಳು ವಾರ, ಸಾಲಿಡ್‌ ಕಲ್ಚರ್ ಟೆಸ್ಟ್‌ ಮಾಡಿದರೆ ಮೂರು ತಿಂಗಳು ಕಾಯ­ಬೇಕು. ರೋಗಪತ್ತೆ ತಡವಾದರೆ ಚಿಕಿತ್ಸೆ ಆರಂಭವೂ ತಡವಾಗುತ್ತದೆ. ಇದರಿಂದ ರೋಗಿಗೆ ತೊಂದರೆ ಮಾತ್ರವಲ್ಲ, ರೋಗ ಹರ­ಡುವುದು ಕೂಡ ಹೆಚ್ಚಾಗುತ್ತದೆ. ಈ ಹಿನ್ನೆಲೆ­ಯಲ್ಲಿ ಜೀನ್‌ ಎಕ್ಸ್‌ಪರ್ಟ್‌ ಉಪಕರಣ ಉತ್ತರ ಕರ್ನಾಟಕಕ್ಕೆ ವರದಾನ ಎನ್ನುತ್ತಾರೆ ಸಿಬ್ಬಂದಿ.



ಜೀನ್‌ ಎಕ್ಸ್‌ಪರ್ಟ್‌ ಒಂದು ಸಣ್ಣ, ಪೆಟ್ಟಿಗೆ­ಯಾಕಾರದ ಉಪಕರಣ. ಇದನ್ನು ಕಂಪ್ಯೂಟರ್‌ ಜೊತೆ ಸಂಪರ್ಕಿಸಲಾಗುತ್ತದೆ. ಬಾರ್‌ ಕೋಡ್‌ ಇರುವ ಕಾರ್ಟೇಜ್‌ಗಳಲ್ಲಿ ಹಾಕಿದ ಕಫದ ಮಾದರಿಯನ್ನು ಈ ಉಪಕರಣದ ಒಳಗೆ ಇರಿಸಿದರೆ ಎರಡು ತಾಸುಗಳಲ್ಲಿ ಫಲಿತಾಂಶ ಬರುತ್ತದೆ. ಲೈನ್ ಪ್ರೋಬ್‌ ಟೆಸ್ಟ್‌ನಲ್ಲಿ ಕಫದ ಮಾದರಿ ಪರೀಕ್ಷೆಗೆ ₨ ಏಳರಿಂದ ಎಂಟು ಸಾವಿರ ವೆಚ್ಚವಾದರೆ ಜೀನ್‌ ಎಕ್ಸ್‌ಪರ್ಟ್‌ನಲ್ಲಿ ಕೇವಲ ₨ ಎರಡು ಸಾವಿರ ಸಾಕಾಗುತ್ತದೆ. ಕಿಮ್ಸ್‌ನಲ್ಲಿ ಇದು ಉಚಿತವಾಗಿ ನಡೆಯುತ್ತದೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.