`ಬಂಗಾ ಬೀಟ್ಸ್' ಲಾಂಛನ ಬಿಡುಗಡೆ

ಬೆಂಗಳೂರು: ಆಗಸ್ಟ್ 14ರಿಂದ ಆರಂಭಗೊಳ್ಳಲಿರುವ ಇಂಡಿಯನ್ ಬ್ಯಾಡ್ಮಿಂಟನ್ ಲೀಗ್‌ನ (ಐಬಿಎಲ್) ಫ್ರಾಂಚೈಸ್ ಆಗಿರುವ ಬೆಂಗಳೂರಿನ `ಬಂಗಾ ಬೀಟ್ಸ್' ತಂಡ ಶುಕ್ರವಾರ ತನ್ನ ಲಾಂಛನ ಬಿಡುಗಡೆಗೊಳಿಸಿತು.



ರಾಜ್ಯ ಬ್ಯಾಡ್ಮಿಂಟನ್ ಸಂಸ್ಥೆಯಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಒಲಿಂಪಿಯನ್ ಅಶ್ವಿನಿ ಪೊನ್ನಪ್ಪ ಹಾಗೂ ನಟ ಪುನೀತ್ ರಾಜಕುಮಾರ್ ಬಂಗಾ ಬೀಟ್ಸ್ ತಂಡದ ಲಾಂಛನ ಬಿಡುಗಡೆ ಮಾಡಿದರು. ಈ ವೇಳೆ ಮಾತನಾಡಿದ ಅಶ್ವಿನಿ ಅವರು `ಐಪಿಎಲ್‌ನಂತೆ ಐಬಿಎಲ್ ಕೂಡ ಉದಯೋನ್ಮುಖ ಆಟಗಾರರಿಗೆ ಉತ್ತಮ ವೇದಿಕೆಯಾಗುವ ವಿಶ್ವಾಸವಿದೆ' ಎಂದು ಅಭಿಪ್ರಾಯ ಪಟ್ಟರು.



ನಟ ಪುನೀತ್ ಮಾತನಾಡಿ `ಬ್ಯಾಡ್ಮಿಂಟನ್ ಅಂದ್ರೆ ಇಷ್ಟ. ನಾನೂ ಆಡುತ್ತಿದ್ದೆ. ಇದೀಗ ಬ್ಯಾಡ್ಮಿಂಟನ್ ಲೀಗ್ ಶುರುವಾಗುತ್ತಿರುವುದು ಸಂತಸ ತಂದಿದೆ' ಎಂದರು. ಮೂಲತಃ ರಿಯಲ್ ಎಸ್ಟೇಟ್ ಕಂಪೆನಿಯಾಗಿರುವ ಬಿಒಪಿ, ಬೆಂಗಳೂರಿನ `ಬಂಗಾ ಬೀಟ್ಸ್' ತಂಡದ ಫ್ರಾಂಚೈಸ್ ಪಡೆದಿದೆ.



ತಂಡದ ಕೋಚ್ ಯು. ವಿನಯ್ ಕುಮಾರ್, ಸಿಇಒ ವಿಜಯ್ ಲ್ಯಾನ್ಸಿ, ರಾಜ್ಯ ಬ್ಯಾಡ್ಮಿಂಟನ್ ಸಂಸ್ಥೆ ಅಧ್ಯಕ್ಷ ಜಿ. ಜೈರಾಜ್, ಸಂಸ್ಥೆಯ ಕಾರ್ಯದರ್ಶಿ ಎನ್.ಸಿ. ಸುಧೀರ್ ಹಾಗೂ ಇತರರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.