ಬಿಸಿಯೂಟ ಸೇವನೆ ತಮಿಳುನಾಡಿನಲ್ಲಿ ನೂರಾರು ಮಕ್ಕಳು ಅಸ್ವಸ್ಥ

ನೇವೇಲಿ (ಪಿಟಿಐ): ಬಿಹಾರದಲ್ಲಿ ಬಿಸಿಯೂಟ ಸೇವಿಸಿ ಮೃತಪಟ್ಟ ಮಕ್ಕಳ ಸಂಖ್ಯೆ 23ಕ್ಕೆ ಏರಿದ ಬೆನ್ನಲ್ಲೆ ಗುರುವಾರ ತಮಿಳುನಾಡಿನಲ್ಲಿ ಬಿಸಿಯೂಟ ಸೇವಿಸಿದ ನೂರಾರು ಹೆಣ್ಣುಮಕ್ಕಳು ಅಸ್ವಸ್ಥಗೊಂಡು ಆಸ್ಪತ್ರೆಗೆ ದಾಖಲಾಗಿದ್ದಾರೆ.



ಇಲ್ಲಿನ ನೇವೆಲಿ ಲಿಗ್‌ನೈಟ್ ಕಾರ್ಪೋರೇಷನ್ ಬಾಲಕಿಯರ ಶಾಲೆಯ 7 ಹಾಗೂ 8 ನೇ ತರಗತಿಯ ಸುಮಾರು 105 ವಿದ್ಯಾರ್ಥಿನಿಯರು ಗುರುವಾರ ಮಧ್ಯಾಹ್ನದ ಬಿಸಿಯೂಟದಲ್ಲಿದ್ದ ಮೊಟ್ಟೆಯನ್ನು ಸೇವಿಸಿದ ಬಳಿಕ ವಾಂತಿ ಮಾಡಿಕೊಳ್ಳಲಾರಂಭಿಸಿದರು. ಕೆಲವರು ಪ್ರಜ್ಞಾಶೂನ್ಯರಾದರು.



ತಕ್ಷಣ ಅವರನ್ನೆಲ್ಲಾ ಆಸ್ಪತ್ರೆಗೆ ದಾಖಲಿಸಲಾಯಿತು. ಸದ್ಯ ಮಕ್ಕಳು ಅಪಾಯದಿಂದ ಪಾರಾಗಿದ್ದಾರೆ ಎಂದು ವೈದ್ಯರು ತಿಳಿಸಿದ್ದಾರೆ.