ತಿಪಟೂರು: ಬೆಂಕಿ ಅವಘಡ ಸಂಭವಿಸಿದ ಇಕ್ಕಟ್ಟಾದ ಪ್ರದೇಶದಲ್ಲಿ ಸಲೀಸಾಗಿ ನುಗ್ಗಲು ಮತ್ತು ತುರ್ತಾಗಿ ಧಾವಿಸಿ ಆರಂಭದಲ್ಲೇ ಬೆಂಕಿ ನಿಯಂತ್ರಿಸಲು ಸುಸಜ್ಜಿತ ಬೈಕ್ ನಗರದ ಅಗ್ನಿಶಾಮಕ ಠಾಣೆಗೆ ಬಂದಿದೆ.
ಇದೇ ಪ್ರಥಮ ಬಾರಿಗೆ ಇಲ್ಲಿನ ಠಾಣೆಗೆ ಕೊಟ್ಟಿರುವ ಈ ಬೈಕ್‌ನಲ್ಲಿ ಬೆಂಕಿ ನಂದಿಸಲು ಬೇಕಾದ ಉಪಕರಣಗಳನ್ನು ಜೋಡಿಸಲಾಗಿದೆ.ಮಿಸ್ಟ್ ಎಂಬ ನೂತನ ತಾಂತ್ರಿಕತೆ ಇರುವುದು ಬೈಕ್‌ನ ವಿಶೇಷ. ಅಂದಾಜು ₨ 4.5 ಲಕ್ಷ ಬೆಲೆಯ ಬೈಕ್ ಸೈರನ್, ನೀರಿನ ಟ್ಯಾಂಕರ್, ಅಗ್ನಿ ಶಾಮಕ ಸಿಲಿಂಡರ್ ಒಳಗೊಂಡಿದೆ.ಹತ್ತು ಲೀಟರ್ ನೀರು ಸಂಗ್ರಹದ ಎರಡು ಟ್ಯಾಕರ್ ಹಾಗೂ 5 ಕೆ.ಜಿ. ಸಿಲಿಂಡರ್ ಇವೆ.
ಸಣ್ಣ ಪ್ರಮಾಣದ ಅಗ್ನಿ ಅನಾಹುತ ಸಂಭವಿಸಿದ ಸಂದರ್ಭದಲ್ಲಿ ಹಾಗೂ ಅಗ್ನಿಶಾಮಕ ದಳದ ದೊಡ್ಡ ವಾಹನಗಳು ತೆರಳಲು ಸಾಧ್ಯವಿಲ್ಲದ ಸ್ಥಳಗಳಲ್ಲಿ ಇದನ್ನು ಬಳಸಲು ವಿನ್ಯಾಸ ಮಾಡಲಾಗಿದೆ ಎಂದು ಅಗ್ನಿ ಶಾಮಕ ಠಾಣಾಧಿಕಾರಿ ಜಿ.ಬಿ.ಸೋಮಶೇಖರಯ್ಯ ತಿಳಿಸಿದ್ದಾರೆ.
