ಬ್ಯಾಡ್ಮಿಂಟನ್: ಸೈನಾ ಪರಾಭವ; ಸೆಮಿಗೆ ಶ್ರೀಕಾಂತ್

ಬ್ಯಾಂಕಾಕ್ (ಪಿಟಿಐ): ಸೈನಾ ನೆಹ್ವಾಲ್ ಇಲ್ಲಿ ನಡೆಯುತ್ತಿರುವ ಥಾಯ್ಲೆಂಡ್ ಓಪನ್ ಗ್ರ್ಯಾನ್ ಪ್ರಿ ಗೋಲ್ಡ್ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಪರಾಭವಗೊಂಡಿದ್ದು, ಚಾಂಪಿಯನ್ ಪಟ್ಟ ಉಳಿಸಿಕೊಳ್ಳುವಲ್ಲಿ ವಿಫಲರಾಗಿದ್ದಾರೆ. ಆದರೆ ಪುರುಷರ ವಿಭಾಗದಲ್ಲಿ ಕೆ.ಶ್ರೀಕಾಂತ್ ಸೆಮಿಫೈನಲ್ ಪ್ರವೇಶಿಸಿದ್ದಾರೆ.



ಶುಕ್ರವಾರ ನಡೆದ ಕ್ವಾರ್ಟರ್  ಫೈನಲ್ ಪಂದ್ಯದಲ್ಲಿ ಸೈನಾ 21-13, 12-21, 18-21ರಲ್ಲಿ ಸಿಂಗಪುರದ ಜುವಾನ್ ಗು ಎದುರು ಪರಾಭವಗೊಂಡರು.



20 ವರ್ಷದ ಶ್ರೀಕಾಂತ್ ದಕ್ಷಿಣ ಕೊರಿಯಾದ ವಾನ್ ಹೊ ಸೊನ್ ಅವರನ್ನು 21-17,21-18 ರಲ್ಲಿ ಮಣಿಸಿದರು. ನಾಲ್ಕರ ಘಟ್ಟದ ಪಂದ್ಯದಲ್ಲಿ ಶ್ರೀಕಾಂತ್ ಅವರು ಥಾಯ್ಲೆಂಡ್‌ನ ಥಮ್ಮಸಿನ್ ಸಿತ್ತಿಕೊಮ್ ವಿರುದ್ಧ ಸೆಣಸಲಿದ್ದಾರೆ.



ಮೊದಲ ಗೇಮ್‌ನಲ್ಲಿ ಎರಡನೇ ರ‌್ಯಾಂಕ್‌ನ ಆಟಗಾರ್ತಿ ಸೈನಾ ಉತ್ತಮ ಪ್ರದರ್ಶನ ನೀಡಿದರು. ಆದರೆ ಉಳಿದ ಗೇಮ್‌ಗಳಲ್ಲಿ ಅದೇ ಮಟ್ಟದ ಆಟ ಕಾಯ್ದುಕೊಳ್ಳುವಲ್ಲಿ ಅವರು ವಿಫಲರಾದರು.